અમદાવાદમાં કાળઝાળ ગરમી કેર વર્તાવી રહી છે અને છેલ્લા 30 માંથી 29 દિવસ તાપમાન 41 ડિગ્રીથી વધારે નોંધાયું છે. કાળઝાળ ગરમીથી ઝાડા-ઉલટી, બ્લડ પ્રેશર સહિતના દર્દીઓમાં સતત વધારો થઇ રહ્યો છે. સોલા સિવિલમાં એપ્રિલના 24 દિવસમાં 28 હજારથી વધુ દર્દીઓ સારવાર માટે આવ્યા છે. વધુ ચિંતાની વાત એ છે કે, બાળકોમાં કાળઝાળ ગરમીથી બિમાર પડવાના પ્રમાણમાં વધારો થઇ રહ્યો છે. સોલા સિવિલ ખાતે એપ્રિલ મહિનામાં જ 1205 દર્દીઓ ઓપીડીમાં સારવાર માટે આવ્યા હતા. 

જેમાંથી 560 એટલે કે અડધોઅડધ બાળકોને હોસ્પિટલમાં દાખલ કરવાની ફરજ પડી હતી. ડોક્ટરોના મતે બાળકોને જરૂર ન હોય તો સવારે 11થી સાંજ સુધી બહાર લઇ જવા જોઇએ નહીં. બાળકને બહાર જવું જ પડે તેમ હોય તો તેમને લીંબુ પાણી, ઓઆરએસ સતત આપતા રહેવું જોઇએ. આ જ પ્રકારની તકેદારી વૃદ્ધો અને સગર્ભા મહિલાઓએ પણ રાખવાની જરૂર છે. સોલા સિવિલમાં માર્ચ માસમાં 29 હજારથી વધુ દર્દીઓ ઓપીડીમાં આવ્યા હતા. એપ્રિલ માસમાં દર્દીઓનો આંક 35  હજારથી વધે તેવી સંભાવના છે. હજુ મે મહિનામાં આ આંક હજુ પણ વધી શકે છે. 

​