ગાંધીનગરનાં સેક્ટર ૨૪માં આદર્શ નગર પીળા પટ્ટા વિસ્તારમાં વર્ષોથી ગેરકાયદેસર રીતે ઊભા થઈ ગયેલા પાકા દબાણો મહાનગર પાલિકાની ટીમો દ્વારા હટાવવામાં આવ્યા હતા. રોડ બનાવવા માટે જેસીબી મશીન પણ ન જઈ શકે તેવી સ્થિતિ ઊભી થઈ ગઈ હતી તેના કારણે આ કાર્યવાહી કરવામાં આવી હતી. રાજ્યના પાટનગર ગાંધીનગર શહેરમાં પણ હવે ધીરે ધીરે પાકા દબાણો વધી રહ્યા છે. ખાસ કરીને જુના સેક્ટરોમાં સેક્ટર ૨૪માં છેલ્લા ઘણા વર્ષોથી દબાણો દિન પ્રતિદિન વધી રહ્યા છે. હાલમાં પાણી અને ગટરની નવી લાઇન નાખવા માટે પણ અહીં મોટો પ્રશ્ન ઉદભવ્યો હતો કેમ કે, દબાણને કારણે ગટરના મેન હોલ પણ ઢંકાઈ ગયા હતા ત્યારે હાલમાં નવા રોડ બનાવવા માટેની કામગીરી ચાલી રહી છે.

ત્યારે સેક્ટર ૨૪ આદર્શ નગર પીળા પટ્ટા વસાહતમાં જેસીબી મશીન પણ અંદર ન જઈ શકે તેવી સ્થિતિ ઉવી હતી. જેના કારણે મહાનગરપાલિકા દ્વારા આ દબાણકારોને તેમના દબાણ હટાવી દેવા માટે નોટિસ પાઠવવામાં આવી હતી પરંતુ કોર્પોરેશનની નોટિસને પણ આ દબાણકારોએ અવગણી હતી. જેના કારણે આજે પોલીસ બંદોબસ્ત સાથે મહાનગરપાલિકાના એસ્ટેટ વિભાગ દ્વારા દબાણ હટાવવાની કામગીરી શરૂ કરવામાં આવી હતી. એક પછી એક એમ ૫૦ મકાનોની કમ્પાઉન્ડ સહિતના પાકા દબાણો દૂર કરી દીધા હતા અને આગામી દિવસમાં પણ આ કામગીરી ચાલુ રાખવાનો નિર્દેશ આપવામાં આવ્યો હતો. વર્ષો જૂના પાકા દબાણો હટાવવામાં આવતા આ વિસ્તારમાં રહેતા રહીશોમાં પણ હાશકારો જોવા મળ્યો હતો કેમકે આ દબાણોને કારણે વસાહતમાં આવવા જવામાં પણ ભારે મુશ્કેલીનો સામનો કરવો પડતો હતો.