રાજ્યમાં ચોમાસાનો વિધિવત પ્રારંભ થઈ ગયો છે. ‘બિપોરજોય’ વાવાઝોડાને પગલે આ વર્ષે નિયત સમય કરતા 10 દિવસ મોડું શરૂ થયુ છે ત્યારે છેલ્લા 24 કલાક દરમિયાન રાજ્યનાં 94 તાલુકામાં મેઘરાજા વરસ્યા હતા. ભાવનગરના ઘોઘામાં સૌથી વધુ ત્રણ ઈંચ વરસાદ વરસ્યો હતો અને અનેક જગ્યાએ પાણી ભરાય ગયા હતા. ગુજરાતનાં દરિયાકાંઠે આવેલા ‘બિપોરજોય’ વાવાઝોડાને કારણે ચોમાસાની શરૂઆત 10 દિવસ મોડી શરૂ થઈ છે ત્યારે હવે ચોમાસું વિધિવિત બેસી ગયુ છે અને ગતરોજથી જ અનેક જિલ્લાઓમાં વરસાદ વરસી રહ્યો છે. વરસાદને પગલે વાતાવરણમાં ઠંડક પ્રસરી ગઈ છે.

હવામાન વિભાગે ભારે વરસાદની આગાહી કરી હતી જે મુજબ રાજ્યના 94 તાલુકામાં મુશળધાર વરસાદ વરસ્યો હતો. ગુજરાતમાં હજુ પણ આગામી ચાર દિવસ વરસાદી માહોલ સર્જાશે જેને પગલે ભેજનું પ્રમાણ ઓછું થશે. રાજ્યમાં હવામાન વિભાગે કરેલી આગાહી મુજબ ગતરોજ અનેક જિલ્લાઓમાં વરસાદી માહોલ રહ્યો હતો. છેલ્લા 24 કલાકમાં રાજ્યમાં 94 તાલુકમાં વરસાદ નોંધાયો હતો જેમા ભાવનગરનાં જિલ્લામાં આવેલા ઘોઘામાં 24 કલાકમાં 3 ઈંચ જેટલો વરસાદ ખાબકી ગયો હતો જેના પગલે અનેક વિસ્તારમાં જળબંબાકાર જેવી સ્થિતિ સર્જાય હતી. બીજી તરફ મુશળધાર વરસાદને પગલે ખેતરોમાં પાણી ફરી વળ્યા હતા.

આ ઉપરાંત અમરેલીમાં પણ છેલ્લા 24 કલાકમાં બે ઈંચ જેટલો વરસાદ નોંધાયો છે આ સાથે જ માંગરોળ, વાગરા, ભરુચ, સાયલા, બોટાદ, ગોંડલ અને શિહોરમાં પણ 1.5 ઈંચ જેટલો વરસાદ વરસ્યો હતો તેમજ સૌરાષ્ટ્રનાં ગામડાઓમાં પણ ધોધમાર વરસાદ પડતા ઠેર-ઠેર પાણી ભરાય ગયા હતા. રાજકોટમાં ગતરોજ સવારે વાદળછાયું વાતાવરણ હતુ. જોકે બપોર બાદ મેધરાજાનું આગમન થયુ હતું અને ધોધમાર વરસાદ વરસ્યો હતો જેના પગલે શહેરનાં અનેક વિસ્તારોમાં પાણી ભરાય ગયા હતા. આ સાથે જ રાજકોટ જિલ્લામાં મોટા મહિકામાં વીજળી પડતા એક ખેત મજૂરનું મોત થયુ હતું.

જયારે સૌરાષ્ટ્ર, દક્ષિણ ગુજરાત, મધ્ય ગુજરાત અને ઉત્તર ગુજરાતનાં કેટલાક વિસ્તારોમાં ભારે વરસાદ પડવાની આગાહી કરી છે. બે દિવસ બાદ ચોમાસાનું જોર વધી શકે છે. આજથી ચાર દિવસ રાજ્યમાં વરસાદી વાતાવરણ રહેશે. રાજ્યમાં આજે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, મહિસાગર, પંચમહાલ, દાહોદ, વડોદરા, છોટાઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ, દાદરાનગર હવેલી, દમણના મોટા ભાગના વિસ્તારોમાં ગાજવીજ સાથે વરસાદ પડવાની હવામાન વિભાગની આગાહી છે. જ્યારે મોરબી, જામનગર, રાજકોટ, દ્વારકા, પોરબંદર, જુનાગઢ, અરેલી, ગીરસોમનાથ, ભાવનગર, બોટાદ, સુરેન્દ્રનગરના કેટલાક સ્થળોએ પણ વરસાદ થવાની શક્યતા છે. આ સાથે કચ્છનાં કેટલાક સ્થળોએ પણ વરસાદ થઇ શકે છે તેમ હવામાન વિભાગે માહિતી આપી છે.