હવામાન વિભાગ દ્વારા જારી કરાયેલ એલર્ટ મુજબ, ઉત્તર આંદામાન સમુદ્ર અને તેની નજીકનાં દક્ષિણ આંદામાન સમુદ્ર અને દક્ષિણપૂર્વ બંગાળની ખાડી પર દબાણનો વિસ્તાર રચાયો છે. તે તા.22 ઓક્ટોબરની આસપાસ પશ્ચિમ-ઉત્તરપશ્ચિમ તરફ આગળ વધે તેવી શક્યતા છે. તે તા.23 ઓક્ટોબરે બંગાળની ખાડી પર પહોંચી શકે છે. આ નીચા દબાણનો વિસ્તાર ધીમે ધીમે ચક્રવાતી વાવાઝોડામાં પરિવર્તિત થવાની સંભાવના છે.

ત્યારબાદ ઉત્તરપૂર્વ તરફ આગળ વધીને તા.25 ઓક્ટોબરે પશ્ચિમ બંગાળ-બાંગ્લાદેશના દરિયાકાંઠે પહોંચે તેવી સંભાવના છે, રાહતની વાત એ છે કે, ચક્રવાતને કારણે ભારે વરસાદ અને પવનની ઝડપ અંગે IMDએ હજુ સુધી કોઈ આગાહી કરી નથી. આ ચક્રવાતનું નામ સિતારંગ આપવામાં આવ્યું છે. આ ચક્રવાતનું નામ થાઇલેન્ડ દ્વારા સૂચવવામાં આવ્યુ છે. આરએસએમસી, 6 હવામાનશાસ્ત્રીય સ્ટેશનોનાં જૂથ અને પાંચ પ્રાદેશિક ઉષ્ણકટિબંધીય ચક્રવાત ચેતવણી કેન્દ્રો (TCWC), સાથે મળીને આ ચક્રવાતને નામ આપ્યું છે.

આ પેનલ હેઠળ 13 સદસ્ય દેશો આવે છે. આ પેનલ ચક્રવાત અંગે એડવાઈઝરી જારી કરે છે. જેમાં ભારત, બાંગ્લાદેશ, ઈરાન, માલદીવ, મ્યાનમાર, ઓમાન, પાકિસ્તાન, કતાર, સાઉદી અરેબિયા, શ્રીલંકા, થાઈલેન્ડ, સંયુક્ત અરબ અમીરાત અને યમન સામેલ છે. જોકે ઓડિશામાં તા.24-25 ઓક્ટોબરે ભારે વરસાદની આગાહી કરવામાં આવી છે. પશ્ચિમ બંગાળમાં 24-25 ઓક્ટોબરે ભારે વરસાદ પડી શકે છે અને 26 ઓક્ટોબરે પણ અલગ અલગ જગ્યાએ ભારે વરસાદની આગાહી કરવામાં આવી છે. નાગાલેન્ડ, મણિપુર, મિઝોરમ અને ત્રિપુરામાં સમાન વરસાદની અપેક્ષા છે.