ઉત્તર પ્રદેશનું વારાણસી જ્ઞાનવાપી પરિસરને કારણે હાલમાં ચર્ચાનો વિષય બની ગયું છે. વારાણસીમાં જ્ઞાનવાપી કેમ્પસ સર્વેક્ષણનો ત્રીજો દિવસ છે. સર્વે સવારે 8 વાગ્યાથી શરૂ થયો છે અને સાંજે 5 વાગ્યા સુધી ચાલશે. ભારતીય પુરાતત્વ સર્વેક્ષણ પરિસરમાં હિંદુ પ્રતીકો એકત્રિત કરી રહ્યું છે. પહેલા અને બીજા દિવસના સર્વેમાં ASIની ટીમે હિંદુ ધર્મના ચિહ્નો એકત્ર કરી એક જગ્યાએ સંગ્રહ કર્યા હતા.

શનિવારે ASIએ જ્ઞાનવાપી કેમ્પસમાં સાંજે પાંચ વાગ્યા સુધી વૈજ્ઞાનિક સર્વે કર્યો હતો. શનિવારે ટીમે સેન્ટ્રલ ડોમના હોલનો સર્વે, ફોટોગ્રાફ અને મેપિંગ કર્યું હતું અને ત્યાર બાદ ભોંયરાનો પણ સર્વે કરવામાં આવ્યો હતો. ત્યાંથી 4 ફૂટની મૂર્તિ મળી આવી હતી. મૂર્તિ પર કેટલીક કલાકૃતિઓ છે. મૂર્તિ ઉપરાંત 2 ફૂટનું ત્રિશૂલ અને 5 કલશ પણ મળી આવ્યા હોવાનો દાવો કરવામાં આવ્યો હતો.

ઉપરાંત, હિંદુ પક્ષે ભોંયરાની દિવાલો પર કમળના નિશાન મળ્યા હોવાનો દાવો કર્યો હતો. હિન્દુ પક્ષનું કહેવું છે કે સર્વેક્ષણના બીજા દિવસે જ્ઞાનવાપી સંકુલની પશ્ચિમી દિવાલ પર અડધા પ્રાણી અને અડધા દેવતાની મૂર્તિ જોવા મળી હતી. ભોંયરામાં તૂટેલી મૂર્તિઓ અને સ્તંભો પણ જોવા મળ્યા હતા.ASIની 51 સભ્યોની ટીમ સિવાય 16 લોકોને સર્વેમાં ભાગ લેવાની મંજૂરી છે, જેમાંથી 9 લોકો મુસ્લિમ પક્ષના અને 7 હિન્દુ પક્ષના છે.3 ઓગસ્ટના રોજ અલાહાબાદ હાઈકોર્ટના મુખ્ય ન્યાયાધીશ પ્રિતંકર દિવાકરની બેન્ચે સર્વેની મંજૂરી આપી હતી. મુસ્લિમ પક્ષે આ નિર્ણયને સુપ્રીમ કોર્ટમાં પડકાર્યો હતો, પરંતુ કોર્ટે હાઈકોર્ટના નિર્ણય પર સ્ટે આપવાનો ઈન્કાર કરી દીધો હતો.