ગુજરાત વિધાનસભાની ચૂંટણી માટે આજે ભારતીય જનતા પાર્ટી દ્વારા તેમની પ્રથમ ઉમેદવારોની યાદી જાહેરાત કરી હતી. ભારતીય જનતા પાર્ટીએ 182 વિધાનસભાની સીટમાંથી 160 ઉમેદવારોના નામની જાહેરાત કરી હતી. ગુજરાતમાં ભાજપ દ્વારા રાત્રે જ કેટલાક ઉમેદવારોને ફોનમાં જાણકારી આપવામાં આવી હતી કે તેમની ટીકીટ ફાઇનલ થઇ ગઈ છે. આ દરમિયાન ભારતીય જનતા પાર્ટીએ કેટલાક નેતાઓને રિપીટ કર્યા છે તો કેટલીક બેઠક પર નવો જ પ્રયોગ કરીને નવા ચેહરાને ટીકીટ ફાળવવામાં આવી છે.

ગુજરાત વિધાનસભાની ચૂંટણી માટે ભારતીય જનતા પાર્ટીએ આજે 160 ઉમેદવારોની યાદી જાહેરાત કરતાની સાથે જ ભાવનગરમાં નારાજગી જોવા મળી હતી. ભારતીય જનતા પાર્ટીના ભાવનગરના 300 સભ્યોએ ભાજપમાંથી રાજીનામાં ધરી દીધા હતા. ભાવનગર જિલ્લાના મહુવા તાલુકા પંચાયતના તમામ સભ્યો અને જિલ્લા પંચાયતના તમામ સભ્યો ઉપરાંત મહુવા ભાજપ અને સંગઠનના સભ્યો સહીત અનેક કાર્યકરોએ સામુહિક રાજીનામાં આપી દીધા હતા.

ભારતીય જનતા પાર્ટીએ ઉમેદવારોના નામની જાહેરાત કરતા તેમાં શિવાભાઈ ગોહિલને ટીકીટ આપતા હોબાળો મચી ગયો હતો. ભારતીય જનતા પાર્ટીએ આર.સી મકવાણાની ટીકીટ કાપી નાખી હતી જેને પગલે મહુવાના 300 સભ્યોની નારાજગી સામે આવી હતી અને સામુહિક રાજીનામાં ધરી દીધા હતા. ભાવનગરમાં મહુવા ભાજપના અગેવાઓ અને કાર્યકરોના મત મુજબ શિવાભાઈ ગોહિલ દ્વારા ટીકીટની માંગ કરી ન હતી અને તેમને સમર્થન પણ નથી છતાંપણ ભારતીય જનતા પાર્ટીએ તેમને ટીકીટ આપતા ભાવનગર ભાજપમાં ભડકો થયો હતો.