ગુજરાત વિધાનસભા 2022ની ચૂંટણીનું બ્યુગલ વાગી ગયું છે અને રાજ્યમાં બે તબક્કામાં ચૂંટણી યોજાવાની છે. તમામ પક્ષો આ ચૂંટણીની તૈયારીમાં સંપૂર્ણ રીતે વ્યસ્ત છે,ત્યારે આ વખતે ગુજરાતની હોટ સીટ ઘાટલોડિયા પર રસપ્રદ મુકાબલો જોવા મળી રહ્યો છે. આ વિધાનસભા બેઠકે રાજ્યને બે મુખ્યમંત્રી આપ્યા છે,જોકે આ વખતે કોંગ્રેસે આ બેઠક પર મોટી દાવ રમી લીધો છે.

ઘાટલોડિયા વિધાનસભાએ પાટીદાર પ્રભુત્વ ધરાવતો વિસ્તાર છે અને અહીં રબારી સમાજનું પણ પ્રભુત્વ છે. વર્ષ 2012માં સરખેજ વિધાનસભા બેઠકના સીમાંકન બાદ ઘાટલોડિયા બેઠકની રચના કરવામાં આવી હતી, જ્યાં છેલ્લા બે વખતથી ભાજપનો દબદબો છે અને બંને વખત આ બેઠક મુખ્યમંત્રીની બેઠક તરીકે પણ જાણીતી છે. પૂર્વ સીએમ આનંદીબેન પટેલ વર્ષ 2012માં આ સીટ પર ચૂંટણી મેદાનમાં ઉતર્યા હતા,જેમણે 1 લાખ 54 હજાર મતોથી જીતી મેળવી હતી. વર્ષ 2016 સુધી આનંદીબેન પટેલ આ બેઠક પરથી ધારાસભ્ય હતા, પરંતુ 2017ની ચૂંટણી પહેલા આનંદીબેન પટેલને મુખ્યમંત્રી પદેથી હટાવી દેવામાં આવ્યા હતા.

2017ના પાટીદાર આંદોલનની સૌથી વધુ અસર આ બેઠક પર જોવા મળી હતી.ત્યારબાદ વર્ષ 2017માં આનંદીબેન પટેલ ઉત્તર પ્રદેશના રાજ્યપાલ બન્યા બાદ આનંદીબેનના નજીકના સાથી ભૂપેન્દ્ર પટેલને અહીંથી ટિકિટ આપવામાં આવી હતી. હાર્દિક પટેલની આગેવાની હેઠળના ક્વોટા આંદોલન બાદ પાટીદાર મતદારોમાં ભારે રોષ જોવા મળ્યો હતો, પરંતુ તેમ છતાં ભૂપેન્દ્ર પટેલ 1.17 લાખ મતોની સરસાઈથી જીત્યા હતા.આ બેઠક પર અત્યાર સુધીમાં 2 વિધાનસભાની ચૂંટણી થઈ છે અને બંને વખત અહીંથી ભાજપના ઉમેદવારો જીત્યા છે.

આ સાથે જ મુખ્ય વિપક્ષ કોંગ્રેસ આ બેઠક પર અત્યાર સુધી મુશ્કેલીમાં મુકાઈ ગઈ છે, 2012ની ચૂંટણીમાં આનંદીબેન પટેલ સામે ચૂંટણી લડેલા રમેશભાઈ પટેલને માત્ર 44 હજાર મત મળ્યા હતા, જ્યારે આનંદીબેન પટેલને 1 લાખ 54 હજાર મત મળ્યા હતા. . આ સિવાય 2017ની ચૂંટણીમાં કોંગ્રેસના શશિકાંત પટેલને 57902 વોટ મળ્યા હતા જ્યારે ભાજપના ભૂપેન્દ્ર પટેલને 176552 વોટ મળ્યા હતા. જો કે આ વખતે કોંગ્રેસે આ બેઠક પરથી રાજ્યસભાના સભ્ય અમીબેન યાજ્ઞિકને મેદાનમાં ઉતાર્યા છે.

બીજી તરફ 2017ની ચૂંટણીમાં ઘાટલોડિયા બેઠકના આંકડાની વાત કરીએ તો આ ચૂંટણી માટે અહીં મતદારોની સંખ્યા 352340 હતી. જોકે ચૂંટણી દરમિયાન 242109 લોકોએ મતદાન કર્યું હતું.2017ની ચૂંટણીમાં ઘાટલોડિયા વિધાનસભા બેઠક માટે 13 ઉમેદવારો મેદાનમાં હતા.ભાજપના ભૂપેન્દ્ર પટેલે કોંગ્રેસના શશિકાંત પટેલને 117750 મતોની સરસાઈથી હરાવ્યા હતા.