ગાંધીનગર શહેરનાં નજીક અડાલજની સેન્ટોસા વસાહતમાં પરિવાર પોતાના ઘરમાં સુઇ રહ્યો હતો તે દરમ્યાન મુખ્ય દરવાજેથી ઘરમાં ઘૂસેલા તસ્કરો કબાટ અને તિજોરીમાંથી સોના-ચાંદીના દાગીના અને રોકડ મળીને 9.19 લાખની ચોરી કરી પલાયન થઇ ગયા હતા. બનાવ અંગે અડાલજ પોલીસ મથકમાં ફરિયાદ થતા પોલીસે ગુનો દાખલ કરીને તસ્કરોને શોધવા માટેની મથામણ શરૂ કરી હતી. મળતી માહિતી અનુસાર, વસાહતનાં મકાન નં.14માં રહેતા શિલ્પાબેન પચાણભાઇ ચૌહાણે ફરિયાદ આપી હતી કે, ગત સોમવારનાં રોજ તેમના પતિ ધંધાના કામ અર્થે રાજકોટ ગયા હતા અને તે તેમના ત્રણ બાળકો સાથે કુડાસણમાં લગ્ન પ્રસંગમાં હાજરી આપવા ગયા હતા.

જ્યાંથી રાત્રે ઘરે પરત ફર્યા હતા અને મકાન બંધ કરીને ઉપરના માળે સુઇ ગયા હતા આ દરમ્યાન તસ્કરો તેમના ઘરમાં પ્રવેશ્યા હતા અને લોખંડની તિજોરી તેમજ કબાટમાંથી સોના-ચાંદીના દાગીના અને રોકડ રકમ મળીને રૂપિયા 9.19 લાખની મત્તા ચોરીને પલાયન થઇ ગયા હતા સવારના સમયે શિલ્પાબેન નીચે આવ્યા ત્યારે મકાનમાં સામાન વેરણ છેરણ જોઇને ચોરીનો અંદાજ આવી ગયો હતો જેથી આ મામલે તેમના પતિને જાણ કરી હતી અને અડાલજ પોલીસ મથકમાં ફરિયાદ આપતા પોલીસે સ્થળ ઉપર પહોંચીને ગુનો દાખલ કરીને તસ્કરોને પકડવા માટ દોડધામ શરૂ કરી હતી.