મુંબઈનાં વિરાર (ઈ)ના ગાંધીચોક વિસ્તારમાં આવેલ એસબીઆઈ બેન્કના એક એટીએમ મશીનને ગેસકટરથી તોડી ચોરટાઓ 17 લાખની રોકડ લઈ છૂ થઈ ગયા હતા. આ પ્રકરણે વિરાર પોલીસ વધુ તપાસ ચલાવી રહી છે. આ પ્રકરણે પ્રાપ્ત વિગતાનુસાર, બુધવારે વહેલી સવારે ચાર વાગ્યે આ ઘટના બની હતી. અહીંના ગાંધી ચોક રાજા એપાર્ટમેન્ટમાં આવેલ એસબીઆઈના એટીએમ સેન્ટરને ગેસકટરથી તોડવામાં આવ્યું હતું.

​

ત્યારબાદ ચોરટાઓ અહીંથી 17.22 લાખ રૂપિયાની કેશ ચોરી જવામાં સફળ રહ્યા હતા. વહેલી સવારે અમુક લોકોની નજર નુકસાનગ્રસ્ત એટીએમ સેન્ટર પર પડતા આ બાબતની જાણ પોલીસને કરવામાં આવતા વિરાર પોલીસની એક ટીમ ઘટના સ્થળે પહોંચી ગઈ અને વધુ તપાસ હાથ ધરી હતી.

પોલીસે આ ઘટનાની તપાસ માટે એક વિશેષ ટીમ બનાવી છે. જેણે આસપાસના સીસીટીવી ફૂટેજને આધારે આ પ્રકરણે વધુ તપાસ દરી છે. પોલીસે આ બાબતે શંકા વ્યક્ત કરી હતી કે આ કામ કોઈ એકલ- દોકલ વ્યક્તિનુ નહીં પણ સંગઠીત ટોળીનું લાગી રહ્યું છે. આ પહેલા ફેબુ્રઆરી મહિનામાં વસઈ (ઈ)ના સાતીવલીમાં પણ આવી જ ચોરીની ઘટના બની હતી, જેમાં એસબીઆઈના એટીએમ મશીનને ગેસ કટરથી તોડી 20 લાખની રોકડ ઉપાડી લેવામાં આવી હતી. આ બંને ઘટના વચ્ચે ઘણુ સમય નજરે પડી રહ્યું છે.