ગાંધીનગર શહેર નજીક આવેલા ઉવારસદમાં પાર્ક થયેલી કારમાં વિદેશી દારૂ અને બિયરનો જથ્થો રાખવામાં આવ્યો હોવાની બાતમીના આધારે અડાલજ પોલીસે રેડ કરી કાર માંથી દારૂની નાની-મોટી 696 બોટલો અને બિયરના ટીનની 146 બોટલો મળી આવી હતી. બનાવ અંગે પ્રોહી. એકટ હેઠળ ગુનો દાખલ કરી વધુ તપાસ હાથ ધરી હતી. સુત્રો પાસેથી મળતી માહિતી અનુસાર, અડાલજ પોલીસની ટીમ પેટ્રોલીંગમાં હતી. તે દરમિયાન બાતમી મળી હતી કે, ઉવારસદ ગામમાં નવા ખાંટવાસમાં મેલડી માતાજીના મંદિર પાસે રહેતો મહેશ બચુજી ઠાકોર તેની કાર નંબર જીજે/15/સીએફ/3936માં દારૂ બિયરનો જથ્થો રાખેલ છે અને આ કાર તેના ઘર નજીક પડી છે.જે બાતમીના આધારે પોલીસ ગામમાં પહોંચી હતી અને કારમાં તપાસ કરતાં વિદેશી દારૂની નાની-મોટી 696 બોટલ અને બિયરના 146 ટીન મળી આવ્યા હતા. આમ, પોલીસે કાર માંથી 4.8 લાખનો મુદ્દામાલ કબ્જે કર્યો હતો અને ઘરે તપાસ કરતાં મહેશ નામનો ઈસમ મળી આવ્યો ન હોતો. જેથી તેની સામે પ્રોહી. એકટ મુજબ ગુનો નોંધીને શોધખોળ હાથ ધરવામાં આવી હતી.