વલસાડનાં પારડીની મામલતદાર કચેરી સામે હાઈવે પરથી પસાર થઈ રહેલ લક્ઝરી બસ આગળ ચાલતા વાહન સાથે અથડાતા અકસ્માત સર્જાયો હતો. જેમાં પાંચ મુસાફરોને ઈજા થઈ હતી.

સુત્રો પાસેથી મળતી માહિતી મુજબ, પારડી નેશનલ હાઈવે નંબર-૪૮ ઉપરથી રાતે મુંબઈ તરફ જતી સાઈ દર્શન ટ્રાવેલ્સ નામની લક્ઝરી બસ નંબર જીજે/૦૫/બીએક્સ/૧૧૦૦ પસાર થઈ રહી હતી. તે દરમિયાન નવી મામલતદાર સામે વલસાડથી વાપી જતા ટ્રેક ઉપર બસ આગળ ચાલતા વાહન જોડે અથડાતા અકસ્માત સર્જાયો હતો. અકસ્માત સમયે બસમાં સવાર ૨૦ મુસાફરોના જીવ તાળવે ચોંટી ગયા હતા. જોકે અકસ્માતમાં બસ ચાલક અને ક્લીનર સહિત પાંચથી છ લોકોને ઈજા પહોંચી હતી. ઈજાગ્રસ્તોને સારવાર માટે હોસ્પિટલમાં ખસેડવામાં આવ્યા હતા. બસના ચાલકે ઓવરટેકની લ્હાયમાં અકસ્માત સર્જાયો હોવાનું જાણવા મળ્યું હતું. અકસ્માતમાં બસનાં આગળનાં ભાગનો ભુક્કો બોલાઈ ગયો હતો.