ગાંધીનગરનાં જુના સચિવાલયમાં બ્લોક નંબર એકના ત્રીજા માળે આવેલી રોજગાર તાલીમ કેન્દ્રની કચેરીમાં સવારના સમયે ઓચિંતી આગ લાગતા ગાંધીનગર ફાયર બ્રિગેડને જાણ કરવામાં આવી હતી અને ફાયર બ્રિગેડે સ્થળ ઉપર પહોંચીને પાણીનો મારો ચલાવી આગ ઉપર કાબુ મેળવી લીધો હતો. સદનસીબે આ ઘટનામાં કોઈ જાનહાની થવા પામી ન હતી. ગાંધીનગર શહેરમાં જુના સચિવાલયમાં બ્લોક નંબર એકમાં સવારના સમયે ધુમાડા બહાર આવતા આસપાસના કર્મચારીઓ દોડી આવ્યા હતા અને થોડીવારમાં આગે વિકરાળ સ્વરૂપ ધારણ કર્યું હતું. જેના પગલે ગાંધીનગર ફાયર બ્રિગેડને જાણ કરવામાં આવી હતી.

ફાયર બ્રિગેડ દ્વારા સ્થળ ઉપર પહોંચીને તપાસ કરવામાં આવતા બ્લોક નંબર એકના ત્રીજા માળે આવેલી રોજગાર તાલીમ કેન્દ્રની કચેરીમાં આગ લાગી હોવાનું ધ્યાને આવ્યું હતું. જેના પગલે તુરંત જ પાણીનો મારો ચલાવીને આગ ઉપર કાબુ મેળવવાનો પ્રયાસ શરૃ કરવામાં આવ્યો હતો. અડધો કલાક ઉપરાંતની ભારે જહેમત બાદ ફાયર બ્રિગેડ દ્વારા કચેરીમાં લાગેલી આગ ઉપર સંપૂર્ણ કાબુ મેળવી લેવામાં આવ્યો હતો. ત્યારે આગની ઘટનામાં કચેરીમાં રહેલા તમામ કોમ્પ્યુટર અને અગત્યના દસ્તાવેજો બળીને ખાખ થઈ ગયા હતા. જોકે કયા કારણોસર કચેરીમાં આગ લાગી છે તે હજી સુધી જાણી શકાયું નથી. ફાયર બ્રિગેડ દ્વારા પણ તપાસ શરૃ કરવામાં આવી છે ગાંધીનગર ફાયરબ્રિગેડના સૂત્રોએ જણાવ્યું હતું કે,  આ આગની ઘટનામાં કોઈ જાનહાની થવા પામી નથી કચેરીના દસ્તાવેજોને નુકસાન થયું છે. જોકે આગનું કારણ જાણવા તપાસ કરવામાં આવી રહી છે.