નાણાં પ્રધાન નિર્મલા સિતારમને બેંકો અને અન્ય નાણાંકીય સંસ્થાઓને જણાવ્યું છે કે, તે સુનિશ્ચિત કરે કે તેમના ગ્રાહકો નોમિનેશનની વિગત અપડેટ કરે જેથી ભવિષ્યમાં અનકલેઇમ્ડ નાણાંની સમસ્યાના નિરાકરણમાં મદદ કરે. ગ્લોબલ ફિનટેક ફેસ્ટ (જીએફએફ)માં સંબોધન કરતા સિતારમને જણાવ્યું હતુ કે, હું ઇચ્છું છું કે બેંકિગ પ્રણાલી, મ્યુચલ ફંડ, શેર બજાર સહિતની નાણાંકીય ઇકોસિસ્ટમ ધ્યાનમાં રાખે કે, તેઓ પોતાના ગ્રાહકો સાથે લેવડદેવડ કરતી વખતે એ વાતનું ધ્યાન રાખે કે ગ્રાહકો તેમના વારસદારનું નામ દાખલ કરે અને તેમના સરનામા સહિતની વિગતો આપે. એક રિપોર્ટ અનુસાર ફક્ત બેકિંગ પ્રણાલીમાં જ 35 હજાર કરોડ રૂપિયાથી વધુની રકમ એવી છે જેનો દાવેદાર કોઇ નથી. જ્યારે સમગ્ર સિસ્ટમમાં આવી રકમ એક લાખ કરોડ રૂપિયાથી પણ વધારે છે. RBIએ લોકોને બિનવારિસ રકમની શોધ અને દાવો કરવામાં મદદ કરવા માટે એક કેન્દ્રીયકૃત વેબ પોર્ટલ યુડીજીએએમની તારીખ 17 ઓગસ્ટે શરૂઆત કરી છે.