આણંદમાં એક ભયાનક અકસ્માતની ઘટના સામે આવી છે. જેમાં બોરસદ-રાસ રોડ ઉપર એક્ટિવા પર બેસીને જઈ રહેલો પરિવાર કારે ટક્કર મારતાં રોડ પર ઉછળ્યો હતો. આ અકસ્માતમાં એક પુત્રીનું ઘટના સ્થળે જ્યારે પિતાનું સારવાર દરમિયાન મોત થયું હતું. માતા અને એક પુત્રી હાલ હોસ્પિટલમાં સારવાર હેઠળ છે.

મળતી માહિતી અનુસાર, આણંદમાં બોરસદ-રાસ રોડ ઉપર એક્ટિવા લઈને જઈ રહેલા પરિવારને સામેથી આવી રહેલી એક કારે ટક્કર મારી હતી. જેમાં પુત્રી અને પિતાનું મોત થયું છે અને માતા તથા એક પુત્રી હોસ્પિટલમાં સારવાર હેઠળ છે. અકસ્માત બાદ કાર ચાલક બોરસદ રૂલર પોલીસ મથકે હાજર થયો હતો. કારની ટક્કરથી પરિવાર હવામાં ફંગોળાયો હતો. ચારેયને માથા તેમજ શરીરના અન્ય ભાગે ગંભીર ઈજાઓ પહોંચી હતી. આ ઘટનાની બોરસદ પોલીસને જાણ થતાં જ પોલીસ તથા 108 તાત્કાલિક સ્થળ પર દોડી આવી હતી અને ત્રણેય ઈજાગ્રસ્તોને સારવાર માટે બોરસદની સિવિલ હોસ્પિટલમાં ખસેડવામાં આવ્યા હતાં. સારવાર દરમિયાન પિતાનું મોત નિપજ્યું હતું. જ્યારે નાની બાળકીનું ઘટના સ્થળે જ મૃત્યુ થયું હતું.