ગુજરાતની સરહદે આવેલા ગિરિમથક સાપુતારાથી નાસિક/શિરડી તરફ જતા આંતરરાજ્ય ધોરી માર્ગ ઉપર આવેલા બોરગાવ ખાતે, અપાયેલા ચક્કાજામમાં ગત રાત્રીએ ફસાયેલા ગુજરાતના યાત્રીઓને, લોકસભાના દંડક એવા વલસાડ/ડાંગના સાંસદ ધવલભાઈ પટેલના પ્રયાસોથી અડધી રાત્રે સુવિધાઓ ઉપલબ્ધ કરાવીને, સહી સલામત રીતે તેમના ગંતવ્ય સુધી પહોંચાડવામાં આવ્યા હતા. સાંસદ તરફથી મળેલી વિગતો અનુસાર ગત રાત્રીએ નાસિક તરફથી ગુજરાત આવી રહેલા ચીખલી, નવસારી તરફના અંદાજીત બસો જેટલા યાત્રીઓ, ચક્કાજામને કારણે અડધી રાત્રીએ અટવાયા હતા.

નાના ભૂલકાઓ, વૃદ્ધ અને અશક્ત મુસાફરો, સ્ત્રીઓ વિગેરે અટવાયેલા મુસાફરોએ, સાંસદશ્રી સુધી તેમની આપવિતી વર્ણવતા, શ્રી ધવલભાઈ પટેલે તુરત જ સ્થાનિક પોલીસ તંત્ર અને સંબંધિત સત્તાવાળાઓનો આ બાબતે સંપર્ક સાધતા, સાપુતારા/ડાંગ પોલીસે ખાસ વાહન વ્યવસ્થા કરીને, ચક્કાજામ કરી રહેલા આગેવાનોને મળી તેમની સમજણ અને સહયોગ સાથે, આ મુસાફરોને મદદ પુરી પાડી હતી. સાથે આ મુસાફરો પ્રત્યે માનવિય સંવેદના સાથે તેમના માટે ચા, નાસ્તા અને ભોજન સહિતની સુવિધા ઉપલબ્ધ કરાવી, આપાતકાલીન સ્થિતિમાં પણ માનવિય સંવેદના જગાવી હતી. ઉલ્લેખનીય છે કે, મહારાષ્ટ્રમાં સ્થાનિક પ્રશ્ન બાબતે છેલ્લા કેટલાક સમયથી રસ્તા રોકો આંદોલન ચાલી રહ્યું છે. જેને કારણે ગુજરાતથી મહારાષ્ટ્રના નાસિક/શિરડી તરફ જતા/આવતા મુસાફરો, વાહન ચાલકો અસરગ્રસ્ત થઈ રહ્યા છે.