વલસાડ જિલ્લાનાં કપરાડાના બાલચોંડી ગામેથી પસાર થઈ રહેલા કોઈક અજાણ્યા વાહનના ચાલકે સાયકલ લઈને નાનાપોંઢા શાકભાજી લેવા નીકળેલા કોઠાર ગામના ૬૮ વર્ષીય વૃદ્ધને ટક્કર મારી અકસ્માત સજર્યો હતો. આ અકસ્માતમાં ગંભીર રીતે ઈજાગ્રસ્ત વૃદ્ધનુ ઘટના સ્થળે જ મોત નીપજ્યું હતું.

સૂત્રો પાસેથી મળતી વિગતો એવી છે કે, કપરાડાના કોઠાર ગામના ખોરી ફળિયાના રહીશ બાબુભાઈ હરિયાભાઈ વળાજ્યાં શનિવારે વહેલી સવારે સાયકલ લઈને નાનાપોંઢા ખાતે શાકભાજી લેવા માટે નીકળ્યા હતા. તેઓ કપરાડાના બાલચોંડી ગામના નિશાળ ફળિયા પાસેથી પસાર થઈ રહ્યા હતા. જે દરમિયાન આ રોડ ઉપરથી પસાર થઈ રહેલાં કોઈક અજાણ્યા વાહનના ચાલકે બાબુભાઈની સાઈકલને ટક્કર મારીને ઘટના બાદ સ્થળ પર લોકો ભેગા થયા હતા. જે અકસ્માતમાં ગંભીર રીતે ઈજાગ્રસ્ત બાબુભાઈનું સ્થળ પર જ મોત નીપજ્યું હતું. જ્યારે અકસ્માત સર્જનાર અજાણ્યો વાહન ચાલક ઘટના સ્થળેથી ફરાર થઇ ગયો હતો. બનાવ અંગે મૃતકના પુત્ર મહેન્દ્રભાઈએ અકસ્માત સર્જી ફરાર થઇ જનાર અજાણ્યા વાહનના ચાલક સામે નાનાપોંઢા પોલીસ મથકમા ફરિયાદ નોંધાવી હોવાનું જાણવા મળ્યું હતું.