બારડોલી તાલુકાના માણેકપોર ગામના હાઈવે પર શેરડી કાપણી કરતા મજૂરો સાથે ૬૧ વર્ષની વૃદ્ધા રોડ ક્રોસ કરતી હતી તે સમયે અજાણ્યા પીકઅપ ચાલકે વૃદ્ધાને અડફટે લેતાં માથામાં ગંભીર ઈજા થતાં મોત નીપજ્યું હતું. સુત્રો પાસેથી મળતી માહિતી મુજબ, માણેકપોર ગામે તળાવ પાસે શેરડી કાપણી કરવા આવેલા ડાંગ જિલ્લાના મજૂરોનો પડાવ છે. જેમાં અન્ય મજૂરો સાથે નુરીબેન ઢેડુભાઈ રેકીયાભાઈ બરડે (ઉ.વ.૬૧, મૂળ રહે.ગવહાણ, જી.ડાંગ) પતિ ઢેડુભાઈ તથા પુત્ર મણિલાલ સહિત પરિવાર સાથે રહેતી હતી અને શેરડી કાપણી કરવાની મજૂરી કામ કરતા હતા.

શનિવારે માણેકપોર ગામે ધર્મેશ પટેલના ખેતરમાં શેરડી કાપણી કરેલી હતી. રાત્રે શેરડી ભરવા માટે ટ્રક આવતા અન્ય મજૂરો સાથે નુરીબેન પણ શેરડી ભરવા ગઈ હતી. શેરડી ભરીને મધ્યરાત્રીએ મજુરો પરત માણેકપોર ગામે પડાવ ઉપર જતા હતા તે સમયે ને.હા.નં.૫૩ ઉપર રોડ ક્રોસ કરતી નુરીબેનને અજાણ્યા પીકઅપ ગાડીના ચાલકે અડફટે લઈ રોડ ઉપર પાડી દઈ પીકઅપ લઈ નાસી ગયો હતો. નુરીબેનને માથામાં ગંભીર ઈજા થતાં સારવાર માટે બારડોલી સરકારી દવાખાને લઈ જતાં ફરજ પરના ડોક્ટરે નુરીબેનને મૃત જાહેર કરી હતી. અકસ્માતના બનાવ અંગે બારડોલી રૂરલ પોલીસે અજાણ્યા પીકઅપ ચાલક વિરૂધ્ધ ગુનો નોંધી આગળની કાર્યવાહી હાથ ધરી હતી.