માંડવી તાલુકાના બૌધાન ગામે બૌધાન ઘલા રોડ પર વાવીયા ખાડીના પુલ પાસે પૂરઝડપે પસાર થતાં એક પીકઅપના પીકઅપના ચાલકે બે બાઈકને અડફેટે લીધી હતી. અકસ્માત બાદ પીકઅપ રોડની બાજુના ખેતરમાં ઉતરી ગઈ હતી. અકસ્માતમાં ગંભીર ઈજા પામેલ બાઈક ચાલક વૃદ્ધનું મોત થયું હતું. જ્યારે અન્ય બાઈક પર સવાર બે યુવકને ઈજા થતાં તેમને સારવાર અર્થે હોસ્પિટલમાં ખસેડવામાં આવ્યા હતા.

આ અંગે મળતી માહિતી અનુસાર મૂળ ભાવનગર જિલ્લાના જેસર તાલુકાનાં શેવડીવદર ગામના જાલમભાઈ ભોજભાઈ ગોહિલ (ઉ.વ.૬૩) હાલ સુરત જિલ્લાના માંડવી તાલુકાનાં બૌધાન ગામ રજનિકભાઈની વાડીમાં રહી મજૂરી કામ કરતાં હતા. તેમની સાથે તેમના પત્ની ધનુબેન પણ રહેતા હતા. જોકે બુધવારે સાંજે પાંચેક વાગ્યાની આસપાસ જાલમભાઈ પોતાની બાઈક લઈને બૌધાન-ઘલા રોડ પરથી પસાર થતાં હતા તે સમયે એક બોલેરો પીકઅપના ચાલક જીતેન્દ્ર હરજીરામ બાટ (રહે.ગોહાના, તા. બ્યાવર, જી.અજમેર, રાજસ્થાન)એ પીકઅપ પૂરઝડપે અને ગફ્લતભરી રીતે હંકારી લાવી રોડ પરથી પસાર થતાં જાલમભાઈ સહિત બે બાઈકને ટક્કર મારી પીકઅપ રોડની બાજુમાં આવેલ ખેતરમાં ઉતારી દીધો હતો.

અકસ્માતની જાણ થતાં જ આજુબાજુના લોકો દોડી આવ્યા હતા અને ઈજા પામેલ જાલમભાઈ તેમજ બીજી બાઈક પર સવાર બે યુવકોને ૧૦૮ એમ્બ્યુલન્સ મારફતે હોસ્પિટલ લઈ જવાયા હતા. જાલમભાઈની હાલત નાજુક હોય તેમને વધુ સારવાર માટે સુરતની નવી સિવિલ હોસ્પિટલમાં ખસેડવામાં આવ્યા હતા જ્યાં સારવાર દરમ્યાન તેમનું મોત થયું હતું. બનાવ અંગે પોલીસે પીકઅપ ચાલક જીતેન્દ્ર હરજીરામ બાટ વિરુદ્ધ ગુનો નોંધી આગળની તપાસ હાથ ધરી હતી.