એન્ફોર્સમેન્ટ ડિરેક્ટોરેટએ NCP વડા શરદ પવારનાં નજીકના સહયોગી અને તેમની પાર્ટીનાં પૂર્વ ખજાનચીનાં ઘરે દરોડા પાડ્યા છે. EDએ કહ્યું કે, તેણે મની લોન્ડરિંગ અને બેંક લોન ફ્રોડ કેસ મામલે NCPનાં પૂર્વ ખજાનચી ઈશ્વરલાલ જૈન, તેમના પરિવાર અને તેમની સાથે જોડાયેલી કંપનીઓના પરિસરમાં તપાસ હાથ ધરી છે. સર્ચ દરમિયાન 1.1 કરોડ રૂપિયા રોકડા અને લગભગ 25 કરોડ રૂપિયાની કિંમતના 39 કિલો સોના-હીરાના દાગીના જપ્ત કરવામાં આવ્યા છે. EDનાં સૂત્રોએ જણાવ્યું કે, મહારાષ્ટ્રના જલગાંવ, નાસિક અને થાણેમાં જૈનોના 13 સ્થળો પર દરોડા પાડવામાં આવ્યા હતા. દરમિયાન, ED અધિકારીઓએ મોબાઇલ ફોનમાંથી દસ્તાવેજો મેળવ્યા છે જે જૈનના પુત્ર મનીષ દ્વારા નિયંત્રિત રિયલ્ટી ફર્મમાં લક્ઝમબર્ગ યુનિટમાંથી 50 મિલિયન યુરોની FDI ઓફર સૂચવે છે.

ED અધિકારીઓનાં જણાવ્યા અનુસાર, જલગાંવમાં 2 બેનામી મિલકતો ઉપરાંત, રાજમલ લખીચંદ જૂથની 50 કરોડથી વધુની કિંમતની 60 મિલકતોની વિગતો પણ દરોડામાં એકત્રિત કરવામાં આવી છે. ED અધિકારીઓએ જણાવ્યું હતું કે, જૈન દ્વારા નિયંત્રિત 3 જ્વેલરી કંપનીઓના ખાતાઓની તપાસ દરમિયાન, તેઓએ જોયું કે લોન રાજમલ લખીચંદ જૂથ સાથે સંકળાયેલી પાર્ટીઓ દ્વારા બનાવટી ખરીદ-વેચાણ સોદાના જટિલ વેબ દ્વારા આપવામાં આવી હતી. તમને જણાવી દઈએ કે, ગયા વર્ષે ડિસેમ્બરમાં સીબીઆઈના દિલ્હી યુનિટે રાજમલ લખીચંદ જ્વેલર્સ, આરએલ ગોલ્ડ અને મનરાજ જ્વેલર્સ અને તેના પ્રમોટર્સ - ઈશ્વરલાલ જૈન, મનીષ જૈન અને તેમના પરિવારના અન્ય સભ્યો વિરુદ્ધ ત્રણ બેંક ફ્રોડ કેસ નોંધ્યા હતા. એવો આરોપ છે કે, જૈને કથિત રીતે સ્ટેટ બેંક ઓફ ઈન્ડિયા પાસેથી 353 કરોડ રૂપિયાની લોન લીધી હતી અને તેને ચૂકવી નથી. આ FIRનાં આધારે EDએ મની લોન્ડરિંગનો કેસ નોંધ્યો છે.