નવસારી એલ.સી.બી.એ યશફીન હોસ્પિટલ નજીકથી વાપીથી સુરત તરફ જતી લકઝરીયસ કારમાંથી એક લાખનો વિદેશી દારૂ સાથે ચાલકની અટક કરી હતી. જ્યારે પાયલોટીંગ કરતી કારનો ચાલક ભાગી ગયો હતો. નવસારી એલ.સી.બી.ના સ્ટાફને બાતમી મળી કે એમજી હેક્ટર કાર નંબર GJ/15/CK/6529માં બનાવેલ ચોરખાનામાં ભારતીય બનાવટનો દારૂનો જથ્થો ભરી નવસારીથી સુરત તરફ જનાર છે. તે દરમિયાન પોલીસે વિરાવળ યશીફીન હોસ્પિટલની સામે વિરાવળથી કસ્બા તરફ જવાના જાહેર રોડ પર નાકાબંધી કરી હતી. દરમિયાન બાતમીવાળી કાર આવતા પોલીસે તેને ઉભી રાખી તપાસ કરતા એક લાખનો દારૂ મળી આવતા ચાલક કૃણાલ મહેશ પટેલ (રહે.ગુંદલાવ, વલસાડ)ની અટક કરી હતી. જ્યારે પાયલોટીંગ કરનાર કાર નંબર GJ/15/CK/6525નો ચાલક ધવલ નરેશ ચૌહાણ (રહે. ડુંગરી, વલસાડ)ને ફરાર જાહેર કર્યો હતો. આમ, પોલીસે દારૂ સહિત કાર મળી રૂપિયા 31.14 લાખનો મુદ્દામાલ કબ્જે કરી ગ્રામ્ય પી.એસ.આઈ. કાર્યવાહી કરી રહ્યાં છે.