મુંબઇમાં 'બેસ્ટ' દ્વારા પહેલી જ વખત ડબલ ડેકર ઇ-બસ દોડતી કરવામાં આવશે. અત્યાર સુધી બેસ્ટના કાફલામાં માત્ર ડિઝલથી ચાલતી ડબલ ડેકર બસો હતી. આ બસો જૂની થવાથી અને ટ્રાફિક માટે સમસ્યારૃપ બનવાથી તબક્કાવાર ઓછી કરવામાં આવી હતી. 'બેસ્ટ' દ્વારા હવે 900 ડબલ ડેકર ઇલેક્ટ્રિક બસ સામેલ કરવામાં આવશે. આ બસની પ્રોટોટાઇપ આવતા અઠવાડિયે આવી પહોંચશે.

સત્તાવાર સૂત્રોના જણાવ્યા મુજબ બેસ્ટ દ્વારા ખાનગી કંપની પાસેથી આ ઇ-બસ ભાડેથી લેવામાં આવશે. આ બસ પ્રાયોગિક ધોરણે દોડતી કરવામાં આવશે. લોકોને કેવો પ્રતિસાદ મળે છે, ટ્રાફિકમાં મુશ્કેલી પડે છે કે નહી તેનો તાગ મેળવી બેસ્ટ દ્વારા રિપોર્ટ તૈયાર કરવામાં આવશે.