વડોદરા શહેરમાં એક દર્દીના પિત્તાશયમાંથી રેકોર્ડબ્રેક 1,628 પથરી કાઢવામાં આવી છે. દર્દીના પિત્તાશયમાંથી આટલી મોટી સંખ્યામાં પથરી નીકળતી જોઈને ડૉક્ટરો પણ આશ્ચર્યચકિત થઈ ગયા. જો કે, આટલી બધી પથરી હોવા છતાં દર્દીને બીજી કોઈ ગંભીર સમસ્યા ન હતી અને હવે ઓપરેશન બાદ તેની હાલત ઠીક છે.

વડોદરાના નવાયાર્ડ વિસ્તારમાં રહેતા 35 વર્ષીય મોહમ્મદ ખાલિક પઠાણ ફેબ્રિકેશનના વ્યવસાય સાથે સંકળાયેલા છે. જ્યારે તેમને પિત્તાશયની પથરી હોવાનું નિદાન થયું ત્યારે તેમને તાત્કાલિક હોસ્પિટલમાં નિદાન માટે દાખલ કરવામાં આવ્યા હતા. અહીંના લેપ્રોસ્કોપિક સર્જન દ્વારા લેપ્રોસ્કોપિક સર્જરી દ્વારા તેના પિત્તાશયની પથરી દૂર કરવાનો નિર્ણય લેવામાં આવ્યો હતો અને ગુરુવારે યુવકની સર્જરી કરવામાં આવી હતી, જેમાં પિત્તાશયમાંથી 1,628 પથરી કાઢવામાં આવી હતી. તબીબી ઇતિહાસમાં આટલી મોટી સંખ્યામાં પથરી કાઢવાનો આ પ્રથમ કિસ્સો છે.લેપ્રોસ્કોપિક સર્જન ડો.લલિત માચર,ડો.જિતેન્દ્ર મિસ્ત્રી અને એનેસ્થેટીસ્ટ ડો.તુષાર ચોકસીએ ઓપરેશન કર્યું હતું. ડોક્ટરોનું માનવું છે કે અતિશય ચરબી,માંસ અને ફાસ્ટ ફૂડનું સેવન પિત્તાશયની પથરી બનવાનું મુખ્ય કારણ છે.

આ સિવાય મેટાબોલિક પ્રક્રિયામાં અવરોધને કારણે પિત્તાશયમાં પથરી બને છે. લેપ્રોસ્કોપિક સર્જરી દ્વારા કાઢવામાં આવેલી પથરીની ગણતરી કરવામાં સ્ટાફને 3 કલાકથી વધુનો સમય લાગ્યો હતો, જ્યારે લેપ્રોસ્કોપિક સર્જરીમાં 2 કલાક જેટલો સમય લાગ્યો હતો. હાલમાં મોહમ્મદ ખાલિક પઠાણની તબિયતમાં સુધારો છે અને તે એકદમ સ્વસ્થ છે.