નર્મદાનાં ડેડીયાપાડા તાલુકાનાં નાની સિંગલોટી ગામે તરાવ નદીનાં પાણીમાં પથ્થર અને ઘાસથી દાટી દેવામાં આવેલો નવજાત શિશુનો મૃતદેહ મળી આવતાં પંથકમાં ચકચાર મચી ગઇ છે. જોકે નદીનાં કિનારે એક તાજુ જન્મેલું બાળક મૃત હાલતમાં મળી આવતા પોલીસે તપાસ હાથ ધરી હતી. થોડા દિવસ પહેલા જ ડેડીયાપાડા સંભુનગર નજીક ચોકડી પાસેથી એક નવજાત બાળક મળી આવ્યું હતું. તેવામાં આવો જ કિસ્સો નાની સિંગલોટી ગામે પ્રકાશમાં આવ્યો છે.

જોકે ગામનાં ચોકીમાલી ફળિયામાં રહેતાં મુળજી વસાવા તરાવ નદીનાં કીનારા વિસ્તારમાં હતાં તે સમયે નદીનાં પાણીમાં ઘાસ અને પથ્થરોથી ઢાંકી દેવાયેલો નવજાત શિશુનો મૃતદેહ જોવા મળ્યો હતો. તેમણે બનાવ અંગે પોલીસને જાણ કરતાં પોલીસ કાફલો દોડી આવ્યો હતો. પ્રાથમિક તબક્કે બાળક તાજુ જન્મેલું હોવાનું જાણવા મળ્યું હતું. જયારે કોઇ નિષ્ઠુર જનેતાએ પોતાનું પાપ છુપાવવા માટે શિશુને વેરાન જગ્યાએ ત્યજી દીધું હોવાનું લાગી રહ્યું છે. પોલીસે નવજાત શિશુને ત્યજી દેનારા કોણ છે તે શોધવા માટે તપાસ હાથ ધરી હતી.