ધરમપુરનાં આવધા ગામમા 12 દિવસ અગાઉ એક દીપડો ઈજાગ્રસ્ત હાલતમાં મળી આવ્યો હતો. વન વિભાગ દ્વારા તે દિપડાની સારવાર શરૂ કરાઈ હતી. જોકે બાદમાં દીપડાનું મોત નીપજ્યું હતુ. ધરમપુરના આવધા ગામના ગદીયાપાડા ફળિયાં ખાતેથી પસાર થતી માન નદીના કાંઠે આવેલા ઝાડી ઝાખરમાં દીપડો ઈજાગ્રસ્ત હાલતમાં મળી આવ્યો હતો. જે દીપડાને વન વિભાગનો સ્ટાફ તથા જીવદયા પ્રેમીઓએ ત્યાંથી ધરમપુર રેન્જ કચેરીએ ખસેડયો હતો. ત્યારબાદ વેટનરી ઓફિસર પાસે સારવાર શરૂ કરાવવામાં આવી હતી. 12 દિવસની સારવાર બાદ દીપડો મોતને ભેટયો હતો. મૃત દીપડાનું પોસ્ટ મોર્ટમ કરી, અગ્નિદાહ આપવામાં આવ્યો હતો.