વાપી જીઆઇડીસીમાં અજાણ્યા વાહને બાઇક ચાલકને અડફેટે લેતા તેનું મોત થયું હતું. બનવાની વિગત એવી છે કે, ધરમપુરમાં એચ.પી.પેટ્રોલપંપ ઉપર નોકરી કરતા નિલેષ દેવરામ રાઉત તેના વતન વાંસદામાં ગામની બાજુમાં રહેતા અને હાલ કરમબેલી રાધે પેટ્રોલપંપ ઉપર કામ કરતા પ્રભુભાઇ છગનભાઇ પવાર (ઉ.વ.35) સાથે સોમવારે ધરમપુરથી કરમબેલી પેટ્રોલ પંપ ઉપર જવા અલગ-અલગ બાઇક લઇને નીકળ્યા હતા.

તે સમય દરમિયાન વાપી દમણગંગા નદી નજીક પહોંચતા આગળ ખૂબ જ ટ્રાફિક હોય જોવા જતા પ્રભુભાઇને કોઇ ચાલક ટક્કર મારી ફરાર થયા હોવાની જાણ થઇ હતી. જેથી લોહીલુહાણ હાલતમાં તેને વાપી સરકારી હોસ્પિટલમાં લઇ જતા ફરજ પરના ડોકટરે પ્રભુને મૃત જાહેર કર્યો હતો. બનાવ અંગે વાપી જીઆઇડીસી પોલીસે અજાણ્યા ચાલક સામે ફરિયાદ નોંધી કાર્યવાહી હાથ ધરી હતી.