ગોલ્ડન ગર્લ તરીકે દેશને એશિયન ગેમ્સમાં સ્વર્ણપદક અપાવનારી, ડાંગની દીકરી કુમારી સરિતા ગાયકવાડ દિલ્હી ખાતે 'કમલા પાવર વુમન એવોર્ડ-૨૦૨૩'થી સન્માનિત થઈ છે. આઠમી એશિયન ગેમ્સમાં દેશને ૪/૪૦૦ મીટરની વિઘ્નદોડમાં સ્વર્ણપદક અપાવનારી ડાંગની આ દોડવીરને, દેશની જુદા જુદા ક્ષેત્રની પાવરફુલ ૭૫ મહિલાઓ સાથે સન્માનિત કરવામાં આવી છે. વિશ્વ મહિલા દિવસના ઉપલક્ષમાં દિલ્હી સ્થિત ડો.આંબેડકર ઇન્ટરનેશનલ સેન્ટર, ૧૫-જનપથ ખાતે આયોજિત આ સન્માન સમારોહમાં, દેશના પ્રતિષ્ઠિત નાગરિકો, સરકારના વરિષ્ઠ મંત્રીશ્રીઓ, અધિકારીશ્રીઓ સહિત જુદા જુદા ક્ષેત્રે વિશિષ્ટ પ્રદાન કરી, દેશનું નામ રોશન કરનારી સન્નારીઓ ઉપસ્થિત રહી હતી. જેમની હાજરીમાં ડાંગની દીકરી કુમારી સરિતા ગાયકવાડે આ સન્માન સ્વીકાર્યું હતું.