ડાંગનાં આહવા એસટી ડેપોમાં કંડક્ટર તરીકે ફરજ બજાવતા મહિલા કંડક્ટર અંકિતાબેન રમણભાઈ પટેલ (ઉ.વ.29) જેઓ ગતરોજ બસ નંબર જીજે/18/ઝેડ/5777માં આહવાથી ચિંચવિહીર બસમાં કંડકટર તરીકે ફરજ પર હતા. તે દરમિયાન પેસેન્જર સખારામ ચૌઘરી (રહે.અબુર) પોતાનું સ્ટેન્ડ આવી જવા છતાં પેસેન્જર પોતાના બસ સ્ટેન્ડ પર નહીં પરંતુ પોતાના ઘર આગળ બસ થોભાવવા કહેતા કંડક્ટરે તેમ નહીં કરવા જણાવ્યું હતું અને નિયમ પ્રમાણે ગામના એસટી સ્ટેન્ડ પર જ બસ થોભતી હોય છે. 

જે બાબતે મુસાફર ઉશ્કેરાઈ જતા ગર્ભવતી મહિલા કંડકટરને વાળ પકડી તમાચો તેમજ ઢીકમુક્કીનો માર માર્યો હતો. પોતાનું ઘર આવતા મુસાફર બસમાંથી ઉતરી જઈ ફરીથી મહિલા કંડકટરને લોખંડના સળિયા વડે મારવાનો પ્રયત્ન કર્યો હતો. ગર્ભવતી મહિલા કંડકટરને પેટના ભાગે ઈજાને પગલે દુ:ખાવો થતા આહવા સિવિલ હોસ્પિટલમાં સારવાર માટે દાખલ થયા હતા. બનાવ અંગે મહિલા કંડકટરે મુસાફર વિરુદ્ધ પોલીસ સ્ટેશનમાં ફરિયાદ નોંધાવતા ગુનો નોંધી આગળની તપાસ આહવા પોલીસે હાથ ધરી હતી.