વઘઇ-બીલીમોરા ટ્રેન પુન: પાટે દોડતી થઈ છે. ત્યારે સમગ્ર આદિવાસી વિસ્તારમાં આ ટ્રેનનું સ્વાગત કરવામાં આવી રહ્યું છે તો મહુવા તાલુકાના અનાવલ રેલ્વે સ્ટેશન પર ટ્રેન આવતા આ વિસ્તારના  લોકોમાં આનંદની લહેર જોવા મળી રહી હતી. લોકડાઉના સમયમાં વઘઇ-બીલીમોરા ટ્રેનના પૈડાં થંભી જતા લોકોએ આ ટ્રેન પુન: શરૂ થવાની આશા જ છોડી દીધી હતી. ત્યારે અનેક રજૂઆતો બાદ બીલીમોરા-વઘઇ ટ્રેન બીલીમોરા ખાતેથી ગતરોજ સાંસદ સી.આર.પાટીલના હસ્તે ટ્રેનને લીલી ઝંડી બતાવાતા જ ટ્રેન ફરી પાટે દોડતા લોકોમાં આનંદ જોવા મળી રહ્યો હતો.

જયારે ગતરોજ અનાવલ રેલ્વે સ્ટેશન પર ટ્રેન આવી પહોંચતા પરિવારના સભ્ય પરત આવી રહ્યા હોય તેમ લોકો ઉત્સાહભેર ઠેર-ઠેર ટ્રેનનું સ્વાગત કરી રહ્યા હતા અને પ્રવાસીઓએ પણ એડવાન્સ બુકીંગ કરી આ ટ્રેનમાં મુસાફરી કરવાની મજા કરી રહ્યા હતા. ગાયકવાડ જમાનાની આ ટ્રેન પુન: નવા રૂપરંગ સાથે શરૂ થતાં લોકોમાં ખુશી જોવા મળી રહી છે.