ડાંગના ગિરિમથક સાપુતારાથી માલેગામ ઘાટ માર્ગમાં અકસમાતનો સિલસિલો ચાલુ જ હોય છે અને ફરી પાછો એક નવો અકસ્માત સર્જાયો છે જેમાં પુણેથી જામફળનો જથ્થો ભરી વડોદરા જતી ટ્રકની એકાએક બ્રેક ફેલ થઈ જતા બેકાબુ બનતી ટ્રક માર્ગના સાઇડે પલટી જતા ટ્રક ઊંડી ખીણમાં જતી અટકી હતી. જોકે, ટ્રકમાં મુકેલ જામફળનો જથ્થો ખીણમાં વેરવિખર થતા ટ્રક માલિક સહિત ખેડૂત તેમજ વેપારીને આર્થિક નુકસાની વેઠવાની નોબત ઉભી થવા પામી હતી. જયારે આ અકસ્માતમાં ચાલક અને કલીનરને સામાન્ય ઇજા પહોંચી હતી. અકસ્માત બાદ સાપુતારા પોલીસે જીઆરડી જવાનોને બંદોબસ્તમાં ગોઠવી દીધા હતા. બનાવ અંગે સાપુતારા પોલીસે ગુનો નોંધી કાયદેસરની કાર્યવાહી હાથ ધરી હતી.