દાદર અને નગરહવેલીનાં ખાનવેલ પોલીસ સ્ટેશનમાં કેદ ચોરીનો આરોપી બુધવારની રાતે પોલીસને ચકમો આપી ફરાર થઇ ગયો હતો. જોકે પોલીસે આરોપીને આખી રાત શોધખોળ હાથ ધરી હતી પરંતુ આરોપીનો કોઈ જ પતો લાગ્યો નથી. જયારે આરોપી પાણી પીવાનું કહેતા તેને કસ્ટડીમાંથી બહાર કાઢવામાં આવ્યો હતો.

સુત્રો પાસેથી મળેલી બાતમીનાં આધારે, કૈલાશ લખમી દળવી (ઉ.વ.22, રહે.ઉદવા, દલવીપાડા) જેઓ થાણાની સેન્ટ્રલ જેલમા કેદ હતો જેને ચોરીના આરોપમા ગત તા.18મે ના રોજ ટ્રાન્સફર વોરંટ પર ખાનવેલ પોલીસ સ્ટેશનમા લાવવામા આવ્યો હતો.

જ્યાં આરોપી બુધવારે રાત્રે નવ વાગ્યે પાણી પીવાના બહાને કસ્ટડીની બહાર નીકળ્યો હતો અને પોલીસને ચકમો આપી ફરાર થઇ ગયો હતો. જોકે ફરાર આરોપીને શોધવા માટે નાકાબંધી કરવામા આવી હતી. પરંતુ આરોપી હજી સુધી પોલીસના હાથે ઝડપાયો નથી.