બારડોલી કોલેજ કેમ્પસમાં પી.આર.બી.આર્ટ્સ એન્ડ પી.જી.આર. કોમર્સ કોલેજ તેમજ પાટીદાર જીન કોલેજના વિદ્યાર્થીઓ દ્વારા સંયુક્ત રીતે જન્માષ્ટમીના તહેવારની ઉજવણી કરવામાં આવી હતી. જેમાં વિદ્યાર્થીઓએ હર્ષોલ્લાસ સાથે ભાગ લઈ દહીં હાંડી ફોડતા કોલેજમાં ભક્તિભાવનું વાતાવરણ સર્જાયું હતું.

જન્માષ્ટમી પૂર્વે ગુરુવારના રોજ બંને કોલેજના વિદ્યાર્થીઓએ કોલેજમાં બગીચામાં ભેગા થઈ નાચગાન અને ઢોલનગારા સાથે જન્માષ્ટમીની ઉજવણી કરી હતી. નાચગાન બાદ બંને કોલેજના વિદ્યાર્થીઓના અલગ અલગ ગ્રૂપ દ્વારા કુલ ચાર મટકી ફોડવામાં આવી હતી. મહત્વની વાત એ હતી કે આ ગૃપ પૈકી એક વિદ્યાર્થિનીઓના ગૃપે પણ પિરામિડ બનાવી હર્ષોલ્લાસ મટકી ફોડી હતી.

આ દરમ્યાન કેટલાક યુવકો દ્વારા લાકડી ફેરવવાના કરતબ કરવામાં આવ્યા હતા જે વિદ્યાર્થીઓ અને પ્રાધ્યાપકોમાં આકર્ષણનું કેન્દ્ર રહ્યું હતું. બારડોલીની આર્ટ્સ એન્ડ કોમર્સ કોલેજના આચાર્ય ડૉ. વિક્રમ ચૌધરી અને પાટીદાર જીન સાયન્સ કોલેજના આચાર્ય ડૉ. ભાવિન નાયકે જણાવ્યુ હતું કે બંને કોલેજના વિદ્યાર્થીઓ દ્વારા આ કાર્યક્રમનું આયોજન કરવામાં આવ્યું છે. કોરોના કાળના બે વર્ષથી વધુ સમય બાદ વિદ્યાર્થીઓએ સામૂહિક રીતે કાર્યક્રમ કરતાં વિદ્યાર્થીઓ અને પ્રાધ્યાપકોમાં ભારે ઉત્સાહ જોવા મળ્યો હતો.