મુંબઈમાં મોટા ભાગનાં નોકરિયાતોને બપોરનું ભોજન પહોંચાડનારા મુંબઈનાં ડબાવાળાએ મુંબઈની આગવી ઓળખ છે. મુંબઈનાં આ ડબાવાળાઓ દિવાળી નિમિત્તે તા.24 થી 27 ઓક્ટોબર દરમિયાન રજા પાળશે. આથી ચાર દિવસ મુંબઈમાં ડબા પહોંચાડવાની સર્વિસ બંધ રહેશે. દિવાળી દરમિયાન ઘણી ઓફિસોમાં રજા હોય છે. વળી આ સમયે સરકારી કાર્યાલયો પણ બંધ હોય છે.

આથી ડબાવાળાઓનું કામ પણ ખુબ થોડું હોય છે. આથી રજાના સમયગાળાને ધ્યાનમાં રાખી અને તેમાંય બે સરકારી રજા આવતી હોવાથી ડબાવાલા યુનિયને તા.24થી 27 ઓક્ટોબર દરમિયાન ટિફિન પહોંચાડવાની સર્વિસ બંધ રાખવાનું નક્કી કર્યું છે. જોકે શુક્રવાર એટલે કે તા.28મી ઓક્ટોબરથી ફરી ડબાવાળાની સર્વિસ રાબેતા મુજબ શરૂ થશે. ઉપરાંત આ રજાના સમયગાળાનો પગાર ગ્રાહકોએ કાપવો નહિ, એવી વિનંતી પણ ડબાવાળાઓએ કરી છે.