ભારતીય જનતા પાર્ટીએ સોમવારે પૂર્વ કોંગ્રેસ અધ્યક્ષ સોનિયા ગાંધીના નિવેદન પર ચૂંટણી પંચમાં ફરિયાદ નોંધાવી છે. સોનિયા ગાંધીએ કર્ણાટક ઇલેક્શનમાં પ્રચાર દરમિયાન કહ્યું હતું કે, પાર્ટી કર્ણાટકની પ્રતિષ્ઠા, સાર્વભૌમત્વ અથવા અખંડિતતા માટે કોઈને ખતરો ઉભો કરવાની મંજૂરી આપશે નહીં. આ ફરિયાદને લઈને ભાજપનું એક પ્રતિનિધિમંડળ સોમવારે ચૂંટણી પંચને મળવા ગયું હતું અને સોનિયા ગાંધી સામે કડક પગલાં ભરવાની માંગ કરી હતી.

સોનિયા ગાંધીના આ નિવેદનને લઈને ભાજપે ચૂંટણી પંચનો સંપર્ક કર્યો છે. ફરિયાદ દાખલ કરનાર કેન્દ્રીય મંત્રી શોભા કરંદલાજેએ નિવેદનને આઘાતજનક અને અસ્વીકાર્ય ગણાવ્યું હતું. તેમણે કહ્યું કે, સોનિયાએ આદર્શ આચાર સંહિતાની જોગવાઈઓનું ઉલ્લંઘન કર્યું છે. તેમણે સોનિયા ગાંધી સામે કડક કાર્યવાહી કરવા વિનંતી કરી હતી.ચૂંટણી પંચને લખેલા પત્રમાં ભાજપે કહ્યું હતું કે, આ પ્રકારની ટ્વીટ કર્ણાટકના કટ્ટર રાષ્ટ્રવાદીઓ, શાંતિપ્રેમી, પ્રગતિશીલ અને વૈશ્વિક સ્તરે માન્યતા પ્રાપ્ત લોકોને ઉશ્કેરવાની દુષ્ટ રચના માનવામાં આવે છે. દેખીતી રીતે તેનો ઉદ્દેશ કર્ણાટકમાં માત્ર મત મેળવવા માટે સમાનતા, સંવાદિતા અને શાંતિને ખલેલ પહોંચાડવાનો છે. કેટલાક પસંદગીના સમુદાયો અથવા જૂથોનું સમર્થન, જેનો એકમાત્ર હેતુ અને ઉદ્દેશ્ય ભારતના અસ્તિત્વને વિક્ષેપિત કરવાનો છે.

ઉલ્લેખનીય છે કે, કર્ણાટકમાં 10 મેના રોજ યોજાનારી વિધાનસભાની ચૂંટણી પહેલા વડાપ્રધાન નરેન્દ્ર મોદીએ તેમની છેલ્લી પ્રચાર રેલીમાં રવિવારે સોનિયા ગાંધીના નિવેદનને પગલે આરોપ લગાવ્યો હતો કે કોંગ્રેસ ખુલ્લેઆમ કર્ણાટકને ભારતથી અલગ કરવાની હિમાયત કરી રહી છે. વડાપ્રધાને હુબલીમાં સોનિયાની ચૂંટણી રેલી બાદ આ આરોપ લગાવ્યો હતો.