ડાંગ જિલ્લાનાં સુબિર તાલુકા પંચાયતમાં સમાવિષ્ટ ગ્રુપ ગ્રામ પંચાયત ગારખડી ખાતે તાલુકા લાયઝન અધિકારી, બી.આર.એસ. તથા તલાટી-કમ-મંત્રીની ઉપસ્થિતમાં ગ્રામ સભાનું આયોજન કરવામાં આવ્યુ હતું. જેમાં માજીસરપંચએ પ્રશ્ન ઉઠાવ્યો હતો કે, ગ્રુપ ગ્રામ પંચાયતનું મકાન વર્ગ ૨૦૨૨-૨૩માં મનરેગા યોજના અંતર્ગત મંજુર થયું હતું. તે મકાન આજદિન સુધી કેમ પૂર્ણ કરવામાં આવ્યું નથી? તેમજ વર્ગ ૨૦૨૨-૨૩ માં ધારાસભ્ય ફંડમાંથી મળેલા પાણીનાં ટેન્કરનો આજદિન સુધી હિસાબ કેમ મળેલો નથી.

તેમણે પ્રશ્ન રજૂ કરતા ગ્રામ સભા ઉગ્ર અને તોફાની બની હતી. એ બે પ્રશ્નોને લઈને તાલુકા પંચાયતનાં સદસ્યનાં પ્રતિનિધિ એકદમ ઉશ્કેરાઈ ગયા હતાં અને ગ્રામસભામાં અધિકારીઓની ઉપસ્થિતમાં જ આ પ્રતિનિધિએ માજી સરપંચ સાથે ખુલ્લા હાથ વડે મારામારી કરતા અફરાતફરીનો માહોલ સર્જાયો હતો. અહીં અધિકારીઓની ઉપસ્થિતમાં જ બે આગેવાનો વચ્ચે મારામારી થતાં ચકચાર મચી ગઈ હતી. આ મારામારીનાં બનાવનાં પગલે ગ્રામજનોએ ગ્રામસભાનો બહિષ્કાર કરતા તલાટી કમ મંત્રીએ તાલુકા વિકાસ અધિકારી સુબિરને રિપોર્ટ કરી વધુ તજવીજ હાથ ધરી હોવાનું જાણવા મળેલ હતું.