ખેરગામના બંધાડ ફળિયાનાં એક ઘરમાં ડમ્પર ઘૂસી જતાં અફરાતફરી બચી ગઈ હતી. આ બનાવમાં પરિવારનો આબાદ બચાવ થયો હતો, પરંતુ એક છોટા હાથી ટેમ્પો અને બાઈકનો કચ્ચરઘાણ નીકળી ગયો હતો. ઉપરાંત બાજુમાં આવેલા ચાર ઘરને પણ નુકસાન થયું હતું. અકસ્માત બાદ ડમ્પર ચાલક ફરાર થઈ ગયો હતો.

મળતી માહિતી મુજબ, ખેરગામના બંધાડ ફળિયામાં આવેલા પેટ્રોલ પંપની બાજુમાં ધવલ મુકેશ પટેલ રહે છે. જોકે રાત્રે તેઓ પરિવાર સાથે ઘરમાં સૂતા હતા. દરમિયાન રાત્રે બાર વાગ્યાના અરસામાં બેફામ દોડી આવેલું એક ડમ્પર નંબર DD/01/F/9367 દીવાલ તોડીને ઘરમાં ઘૂસી ગયું હતું. આ બનાવમાં ઘરમાં સૂતેલો પરિવાર તુરંત બહાર દોડી ગયો હતો. જોકે પરિવાર બીજા રૂમમાં હોવાથી કોઈ જાનહાનિ થઈ ન હતી. આ બનાવમાં એક બાઈક અને છોટા હાથી ટેમ્પો, આંબાની કલમ, સિમેન્ટના થાંભલા સાથે બાજુમાં આવેલાં ચાર ઘરને નુકસાન થયું હતું.