મોટર સાયકલમાં ચોરખાનું બનાવી દારૂ સપ્લાય કરતા વધુ એક ખેપિયાની બાઈક જીલ્લા એલસીબીએ ઝડપી પાડી નિયમોનુસાર કાર્યવાહી હાથ ધરી છે. જોકે આ બનાવમાં આરોપી પોલીસને જોઈ જતા બાઈક મૂકી ફરાર થઇ ગયો હતો.

મળતી માહિતી મુજબ તાપી એલસીબી શાખાના હેડકોન્સ્ટેબલ જગદીશભાઈ જોરારામભાઈ,અનીલકુમાર,તથા પોલીસ કોન્સ્ટેબલ અલ્પેશભાઈ સહિતનો સ્ટાફ પેટ્રોલિંગમાં હતો તે દરમિયાન એલસીબીમાં ફરજ બજાવતા હેડકોન્સ્ટેબલ લેબજીભાઈ પરબતભાઈને મળેલ બાતમીના આધારે સોનગઢના સોનારાપાડા ગામની સીમમાં આવેલ એક સ્ટોન કવોરી પાસે વોચ ગોઠવી હતી.

તે દરમિયાન બાતમી વાળી બાઈક આવતા તેને રોકવાનો પ્રયાસ કર્યો હતો પરંતુ બાઈક ચાલક ખેપીયો બાઈક નંબર જીજે/26/ઈ/173 ને મૂકી ફરાર થઇ ગયો હતો. સ્થળ પર પહોચેલી પોલીસે તપાસ હાથ ધરતા બાઈકના ચોર ખાના માંથી દેશીદારૂ સુગંધી સંતરાની કુલ 96 નંગ બાટલીઓ જેની કી.રૂ. 4,800/- નો દારૂનો જથ્થો મળી આવ્યો હતો. આ બનાવમાં ફરાર આરોપી વિરુદ્ધ સોનગઢ પોલીસ મથકે ગુનો દાખલ કરી નિયમોનુસારની કાર્યવાહી હાથ ધરવામાં આવી છે.