બોર્ડર સિક્યુરિટી ફોર્સે ૪૦ કરોડ રૂપિયાની ૪૦ લાખ નાર્કોટિક્સ ટેબલેટ ‘યાબા’ જપ્ત કરી છે. આ ટેબલેટ પાગલપણાની દવા તરીકે પણ ઓળખાય છે. નાર્કોટિક્સ ટેબલેટનો આ જથ્થો મિઝોરમમાં ભારત-બાંગ્લાદેશ સરહદ પાસેથી મળી આવ્યો છે. રાજ્ય સરકારની સ્પેશિયલ નાર્કોટિક્સ પોલીસ અને બીએસએફના જવાનોના સંયુક્ત ઓપરેશનમાં ઐઝવાલ જિલ્લાના સેલિંગ શહેરમાં નેશનલ હાઇવે નં. ૬ પર એક ટ્રકને રોકી હતી. ચોક્કસ ગુપ્તચર માહિતીને આધારે આ ટ્રકને રોકવામાં આવી હતી. ટ્રકમાંથી કુલ ૪૦ પેકેટ મળી આવ્યા હતાં. આ પેકેટમાં ચાર લાખ મેથેમ્ફેટામાઇન ટેબલેટ (યાબા) હતી.

ગોળીઓનો આ જથ્થો ટ્રક ડ્રાઇવરના કેબિનમાંથી મળી આવ્યો હતો યાબાનો અર્થ થાઇમાં પાગલપણાની દવા તરીકે ઓળખવામાં આવે છે. આ દવામા મેથેમ્ફેટામાઇન અને કેફિનનું સંયોજન છે. એન્ટિ નાર્કોટિક્સ અધિકારીઓના જણાવ્યા અનુસાર, આ દવાઓનું નિર્માણ મ્યાનમારની કેમિકલ લેબોરેટરીઓમાં કરવામાં આવે છે. આ દવા બનાવવા માટેનો કાચો માલ ચીનથી આયાત કરવામાં આવે છે. આ દવાઓની બાંગ્લાદેશમાં દાણચોરી કરવામાં આવે છે. આ માટે ભારતીય સરહદનો ઉપયોગ કરવામાં આવે છે. આ દવાનો વિવિધ પ્રકારે ઉપયોગ કરવામાં આવે છે. આ દવા યુવાનોને ધ્યાનમાં રાખીને બનાવવામાં આવી છે. આ દવાથી કિડની, હૃદય, લિવર અને મગજને નુકસાન થાય છે. ઉલ્લેખનીય છે કે, ૪૦૯૬ કિમીની બીએસએફ ભારત-બાંગ્લાદેશ સરહદનું રક્ષણ કરે છે. ચાલુ વર્ષે અત્યાર સુધીમાં ૬.૨૯ લાખ યાબા દવા જપ્ત કરવામાં આવી છે.