વલસાડનાં ધરાસણા ગામના ભંડારવાડમાં રહેતા શાંતિલાલ નાઓ મેડિકલ એજન્સીમાં કામ કરી, પરિજનોનું ગુજરાન ચલાવે છે. જોકે તેઓ શનિવારે સાંજે તેમના ઘરની પાછળ આવેલા લીમડાના ઝાડ ઉપરથી દાતણ તોડવા માટે ગયા હતા. તે સમયે અચાનક આવી ચડેલા જંગલી ભૂંડે શાંતિલાલભાઈ પર અચાનક હુમલો કરી, તેમના પગ અને જાંઘના ભાગે બચકાં ભરતા શાંતિલાલભાઈ જમીન પર પડી ગયા હતા.

ત્યારબાદ ભૂંડે શાતિલાલભાઈના માથાનાં ભાગે બચકાં ભરતા તેમને ગંભીર ઈજા થઈ હતી. શાતિલાલભાઈએ બૂમાબૂમ કરતા, તેમના પરિજનો સહિતના સ્થાનિક રહીશો ઘટના સ્થળે દોડી ગયા હતા. સ્થાનિક રહીશોએ ભૂંડના હુમલાથી ઈજાગ્રસ્ત શાંતિલાલભાઈને સારવાર માટે ડુંગરીની સી.એચ.સી.માં લઈ ગયા હતા. ત્યારબાદ શાંતિલાલભાઈને વધુ સારવાર માટે વલસાડની સિવિલ હોસ્પિટલમાં દાખલ કરવામાં આવ્ય હતા. જોકે ગામમાં હિંસક ભૂંડના ત્રાસને લઈને ગામના ખેડૂતોની હાલત દયનીય બની હતી.