ધરમપુરના સામરસિંગી ગામના મૂળગામ ફળિયા ખાતે રહેતા નિલેશભાઈ નવસુભાઈ ભોયા ગુરુવારના રોજ મિત્ર અભય અને વિજય સાથે બાઈક ઉપર સવાર થઇ બિલપૂડી ગામે ધોધ નિહાળવા માટે નીકળ્યા હતા. તે દરમિયાન હનમતમાળ-ધરમપુર રોડ પર આવેલા સીદુમ્બર ગામના નિશાળ ફળિયા પાસેથી તેઓ પસાર થઇ રહ્યા હતા.

આ સમયે સામેથી પૂરઝડપે આવી રહેલી કારના ચાલકે નાળાનો આગળના રસ્તાનો ભાગ બેસી ગયો હોવાથી કારને રોંગ સાઈડે લાવી બાઈક સાથે અથડાવી દીધી હતી. જેથી બાઈક ચાલક નિલેશ ભોયા તથા સવાર અભય અને અજયને ગંભીર ઈજાઓ પહોંચી હતી. નિલેશને વધુ ઈજા પહોંચી હોવાથી સ્થળ પર જ તેનું કમકમાટીભર્યું મોત નીપજ્યું હતું. ઘટના બાદ ઈજાગ્રસ્તોને ૧૦૮માં નજીકની હોસ્પિટલમાં ખસેડવામાં આવ્યા હતા. બનાવ અંગે મૃતક નિલેશના ભાઈએ કાર ચાલક દિનેશ તુંકારામ કામડી (રહે.આંબા જંગલ, માથા ફળિયા) વિરુદ્ધ ધરમપુર પોલીસ મથકે ફરિયાદ નોંધાવી હતી.