ભરૂચનાં વાગરા તાલુકાનાં નંદરખાથી પખાજણ વચ્ચે કેનાલ રોડ ઉપર અજાણ્યા વાહન ચાલકે બાઈક સવારને ટક્કર મારતા તેનું ગંભીર ઈજાને કારણે ઘટના સ્થળે જ મોત નીપજ્યું હતું. મળતી માહિતી મુજબ, વાગરાની દાળ મીલ સામે આવેલ અપનાનગર સોસાયટીમાં રહેતા 36 વર્ષીય જાવીદ કનું સિંધા ગતરોજ સાંજના સમયે પોતાની મોટરસાઈકલ નંબર GJ/16/DD/7810 લઇ વાગરા તાલુકાનાં નંદરખાથી પખાજણ ગામ વચ્ચે કેનાલ રોડ ઉપરથી પસાર થઇ રહ્યો હતો.

તે દરમિયાન કેનાલ રોડ ઉપર પુરપાટ ઝડપે ધસી આવેલ અજાણ્યા વાહન ચાલકે જાવીદ સિંધાની બાઈકને ટક્કર મારતા અકસ્માત સર્જાયો હતો. જોકે આ અકસ્માતમાં ગંભીર ઈજાઓને પગલે યુવાનનું ઘટના સ્થળે જ મોત નીપજ્યું હતું. અકસ્માત અંગે વાગરા પોલીસે ગુનો નોંધી તપાસ હાથ ધરી હતી.