બારડોલી સુગર ફેક્ટરી સામે આવેલ ગરનાળા નજીક ભંગારનું ગોદામ ધરાવતા સલીમ અકબર મન્સૂરીના ગોદામની આસપાસ કચરાના ઢગલામાં અચાનક આગ ફાટી હતી. આગના તણખા ભંગારના ગોદામ ઉપર પડતા જોતજોતમાં ભંગારના ગોદામમાં પણ આગ ફેલાઈ હતી. આ સમયે ગોદામમાં મુકેલ એલ.પી.જી.ગેસનો સીલીન્ડર અચાનક ફાટતા બ્લાસ્ટ સાથે સીલીન્ડર ઉછળીને નજીકની ચાની લારી ઉપર પડ્યું હતું.

આ બનાવ અંગે બારડોલી ફાયર-બ્રિગેડની ટીમને જાણ થતાં ઘટના સ્થળે પહોચેલા જવાનોએ ભારે જહેમત બાદ આગને કાબુમાં લીધી હતી. આ આગની બનાવમાં કોઈપણ વ્યક્તિને જાનહાની થઈ ન હતી. પરંતુ આગની ઘટનામાં રૂપિયા 1.20 લાખનું નુકશાન થયું હતું.