બાંગ્લાદેશના બ્રાહ્મણબારિયા જિલ્લામાં એક ૩૬ વર્ષીય વ્યક્તિએ હિન્દુ મંદિરમાં દેવતાની મૂર્તિની તોડફોડ કરી હતી. ગુરુવારે રાત્રે બનેલી આ ઘટનાથી સ્થાનિક હિંદુ સમુદાયમાં ખળભળાટ મચી ગયો હતો. આ ઘટના નિયામતપુર ગામમાં સ્થિત નિયામત પુર દુર્ગા મંદિરમાં સામે આવી છે. આરોપીની ઓળખ ખલીલ મિયા તરીકે થઈ છે. તોડફોડના સમાચાર ફેલાતાં,સ્થાનિકોએ ઝડપથી મામલો પોતાના હાથમાં લીધો હતો અને આરોપીઓનો પીછો કરવામાં અને પકડવામાં પોલીસને મદદ કરી હતી.

બ્રાહ્મણબારિયાના પોલીસ અધિક્ષકે ખલીલ મિયાની ધરપકડની પુષ્ટિ કરી હતી, પરંતુ જણાવ્યું હતું કે તેના કૃત્ય પાછળનો હેતુ અજ્ઞાત છે. તેણે આવું કૃત્ય શા માટે કર્યું તે હજુ નક્કી થયું નથી.તપાસમાં જાણવા મળ્યું છે કે ખલીલ મિયા નિયામતપુર ગામમાં તેની બહેનના ઘરે મળવા આવ્યો હતો ત્યારે આ દુર્ભાગ્યપૂર્ણ ઘટના બની હતી. કેટલાક સ્થાનિક રહેવાસીઓ સાથે તેનો ઝઘડો થયા બાદ તેણે દુર્ગા મંદિરની અંદર માત્ર એક નહીં, પરંતુ પાંચથી છ મૂર્તિઓની તોડફોડ કરી હતી.ખલીલ મિયાની ધરપકડ કરવામાં આવી હતી. પોલીસ અધિકારીએ ખાતરી આપી છે કે આરોપી સામે યોગ્ય કાયદાકીય પગલાં લેવામાં આવશે.