માજી મુખ્ય પ્રધાન ઉદ્ધવ ઠાકરેનાં ખાનગી નિવાસસ્થાન માતોશ્રી બહાર હનુમાન ચાલીસાનું પઠન કરવાની ઘોષણા કરનારા રાણા દંપતીએ કાયદો અને વ્યવસ્થા ખોરવવાનો પ્રયાસ કર્યો હોવાના આરોપસર દાખલ થયેલા ગુના સંબંધે કોર્ટમાં ગેરહાજર રહેવા બદલ બંને સામે જામીનપાત્ર વોરન્ટ જારી કરવામાં આવ્યું છે. અમરાવતીનાં  સાસંદ નવનીતિ રાણા અને તેમના પતિ વિધાનસભ્ય રવિ રાણાને જામીન આપતી વખતે કોર્ટે સુનાવણી દરમિયાન હાજર રહેવાનો પણ આદેશ આપ્યો હતો.

જોકે ગત તા.11 નવેમ્બરે બંનેને કોર્ટમાં હાજર રહેવાનો આદેશ અપાયો હતો, તેમ છતાં તેઓ હાજર રહ્યા નહોતા. વારંવાર આદેશ આપવા છતાં અનુપસ્થિત રહેવા બદલ કોર્ટે ગુરુવારે તેમની સામે જામીનપાત્ર વોરન્ટ જારી કર્યું હતું. વોરન્ટ જામીનપાત્ર હોવાથી આગામી સુનાવણીમાં હાજરી આપીને રૂપિયા 5 હજારના જામીન પર વોરન્ટ રદ કરાવી શકે છે.