ગાંધીનગર શહેર અને જિલ્લામાં છેલ્લા બે અઠવાડિયાથી પાણીજન્ય કોલેરાના કેસ પ્રકાશમાં આવી રહ્યા છે. ગાંધીનગર શહેરમાં અગાઉ પેથાપુર, વાવોલ, સેક્ટર-20 અને સે-13માંથી કોલેરાના કેસ મળી આવ્યા બાદ શહેરી વિસ્તારમાં સમાવિષ્ટ ગોકુળપુરામાંથી એક સાથે ત્રણ જેટલા દર્દીઓનો કોલેરા રિપોર્ટ પોઝિટિવ આવ્યા છે. જેના પગલે કોર્પોરેશન તંત્ર ચોંકી ગયું હતું અને તાત્કાલિક આ વિસ્તારમાં સર્વેની કામગીરી શરૂ કરવામાં આવી હતી.

જેમાં ઝાડા ઉલ્ટીના શંકાસ્પદ 25થી વધુ દર્દીઓ પ્રકાશમાં આવ્યા છે. ગાંધીનગર મહાનગરપાલિકાની આરોગ્ય શાખા દ્વારા મંગળનવારે સેક્ટર-14, ગોકુળપુરા છાપરા વિસ્તારમાં ઝાડા ઉલટીના કેસોની માહિતી મળતા મેડિકલ ઓફિસર ઓફ હેલ્થ, એપીડેમીક મેડિકલ ઓફિસર, સેક્ટર-29 મેડિકલ ઓફિસર તથા સ્ટાફ દ્વારા સર્વેની કામગીરી ચાલુ કરવામાં આવી હતી. અહીં કુલ-10 ટીમો દ્વારા સર્વેલન્સની કામગીરી ચાલુ કરતાં બે દિવસમાં સુધી 25થી પણ વધુ ઝાડા ઉલટીના કેસો મળી આવ્યા હતા.જે પૈકી વધુમાં છ દર્દીઓને વધુ સારવાર માટે સિવિલ હોસ્પિટલ ગાંધીનગર ખાતે મોકલવામાં આવ્યા હતા.

સિવિલમાં આ દર્દીઓના કોલેરાનો ટેસ્ટ કરવામાં આવતા આજે ત્રણ દર્દીના રિપોર્ટ પોઝિટિવ આવ્યો છે. એક સાથે ત્રણ દર્દીના કેસ પોઝિટિવ આવવાની સાથે દરેક દર્દીઓને એક સરખાં જ લક્ષણો હોવાને કારણે આ વિસ્તારને કોલેરાગ્રસ્ત જાહેર કરીને તાત્કાલિક સર્વેલન્સ તથા આરોગ્યની સેવાઓ ત્યાં પહોંચી કરવામાં આવી હતી. કોર્પોરેશનની કુલ 10 ટીમો દ્વારા આ અસરગ્રસ્ત વિસ્તારમાં સર્વે કરીને ત્યાં ઓઆરએસના પેકેટ તથા ક્લોરીનની ટેબલેટનું વિતરણ કરવામાં આવ્યું છે. એટલુજ નહીં, આ વિસ્તારમાં પાણીના લીકેજ મળી આવતા તાત્કાલિક પાણી પુરવઠો બંધ કરી દેવામાં આવ્યો છએ અને પિવા માટે પાણીના જગ ઘરે ઘરે આપવામાં આળી રહ્યા છે.