સુરતનાં વરાછા ભવાની સર્કલ સ્થિત પટેલ નગરમાં આવેલા એમ્બ્રોઈડરીનાં કારખાનામાં નાઈટ શિફ્ટમાં કામ કરતો બિહારી કારીગર એમ્બ્રોઈડરી મશીનમાંથી સીકવન્સ ડીવાઈઝ તથા તેના કાર્ડ મળી રૂપિયા 3.50 લાખના પાર્ટસ ચોરી રીક્ષામાં ફરાર થતા વરાછા પોલીસે CCTV ફૂટેજના આધારે તપાસ હાથ ધરી છે. પોલીસ સૂત્રો દ્વારા પ્રાપ્ત થતી વિગતો મુજબ, મૂળ બોટાદ બરવાળાના ખાભંડા ગામના વતની અને સુરતમાં વરાછા હીરાબાગ પૂર્વી સોસાયટી ઘર નં.એ/17 માં રહેતા 37 વર્ષીય સંજયભાઇ પ્રભુભાઇ પટેલ વરાછા અશ્વનીકુમાર રોડ ભવાની સર્કલ સ્થિત પટેલનગર એ/68માં એમ્બ્રોઈડરીનું કારખાનું ધરાવે છે.

તેમના કારખાનામાં નાઈટ શિફ્ટમાં કામ કરતો અને કારખાનામાં જ રહેતો કારીગર મુકેશ રવિંદ્ર રાવ (ઉ.વ.38, મુળ રહે.લોકરિયા ગામ, મિડલ સ્કુલથી 300 મિટર સાઉથમાં, જી.વેસ્ટ ચંપારણ, બિહાર) ગત 17મીની રાત્રે નોકરીએ હતો. તે દરમિયાન બીજા દિવસે સવારે દિવસની શિફ્ટમાં નોકરી કરતો કારીગર રાજેશકુમાર રામઆશરે કામ પર આવ્યો અને મશીન ચાલુ કરવા પ્રયત્ન કર્યો પણ મશીન ચાલુ નહીં થતા સંજયભાઈને જાણ કરી હતી. સંજયભાઇએ કારખાનામાં જઈ તપાસ કરી તો એમ્બ્રોઈડરી મશીનમાંથી 27 નંગ સીકવન્સ ડીવાઈઝ અને 27 નંગ સીકવન્સ ડીવાઈઝના કાર્ડ નહોતા. આથી તેમણે કારખાનાની સામેના કારખાનાના CCTV ફૂટેજ ચેક કર્યા તો મુકેશ રાત્રી દરમિયાન રૂપિયા 3.50 લાખની પાર્ટસ રીક્ષામાં મૂકી ચોરી કરી ફરાર થતો નજરે ચઢ્યો હતો. બનાવ અંગે સંજયભાઇએ વરાછા પોલીસ મથકમાં ફરિયાદ નોંધાવતા પોલીસે ફૂટેજના આધારે વધુ તપાસ હાથ ધરી છે.