સોનગઢ પોલીસ મથકે ગત સને-2017માં નોંધાયેલા ગુનાનાં આરોપીને આજીવન કેદની સજા થતાં તેને લાજપોર જેલ મોકલવામાં આવ્યો હતો. જોકે આ આરોપી હાઈકોર્ટ માંથી 10 દિવસનાં વચગાળાનાં જામીન મેળવી બાદમાં ફરાર થઈ જતાં જેલરે એ કેદી સામે ફરિયાદ નોંધાવી હતી. મળેલી વિગત પ્રમાણે મૂળ વ્યારા તાલુકાના ચાંપાવાડી ગામે રહેતો યાકુબ ચંદુભાઈ ગામીત સામે ગત-2017નાં વર્ષમાં સોનગઢ પોલીસ મથકે હત્યાનો ગુનો દાખલ થયો હતો અને પોલીસે તેની આ ગુનામાં ધરપકડ કરી તેની સામે સેશન્સ કોર્ટમાં ચાર્જશીટ દાખલ કરી હતી. યાકુબ ગામીત સામે કોર્ટમાં કેસ ચાલી જતાં ગત તા.11/4/19નાં રોજ નામદાર જજે તેને તકસીરવાર ઠેરવી આજીવન કેદની સજા અને 1 લાખ રૂપિયાનો દંડ કર્યો હતો. એ પછી સોનગઢ પોલીસે તેને આજીવન કેદની સજા ભોગવવા માટે લાજપોર જેલ મોકલી આપ્યો હતો.

આમ, લાજપોર જેલમાં બંધ પાકા કામનાં આ કેદી યાકુબ ગામીત જામીન મેળવવા માટે ગુજરાત હાઈકોર્ટમાં અપીલ કરી હતી અને એ આધારે હાઈકોર્ટ દ્વારા કેદી યાકુબ ગામીતનાં 10 દિવસનાં વચગાળાનાં જામીન મંજૂર કરવામાં આવ્યાં હતા, જેથી લાજપોર જેલનાં સ્ટાફ દ્વારા ગત 21/10/22નાં રોજ તેને ચાંપાવાડી ખાતે મુક્ત કરવામાં આવ્યો હતો. આ કેદીને 10 દિવસ પછી 1/11/22નાં રોજ ફરીથી લાજપોર જેલ ખાતે હાજર થવાનું હતું પણ તે પેરોલ જમ્પ કરી નાસી ગયો હતો.

આ અંગે લાજપોરનાં પોલીસ સ્ટાફ દ્વારા તાપી પોલીસ વડા અને સોનગઢ તથા વ્યારાનાં પોલીસ ઇન્સ્પેક્ટરોને સદર કેદીને ઝડપી પાડવા જાણ કરવામાં આવી હતી પણ તે મળી આવેલ ન હતો. આ બાબતે લાજપોર જેલના જેલર આર એસ કુડેચાએ સુરતના સચિન પોલીસ મથકે પાકા કામના કેદી સામે ફરિયાદ લખાવતાં આ ફરિયાદના કાગળો સોનગઢ પોલીસ મથકે મોકલવામાં આવ્યા હતા. સોનગઢ પોલીસે ભાગી ગયેલા કેદી યાકુબ ગામીત વિરુદ્ધ ગુનો દાખલ કરી તેની શોધખોળ શરૂ કરી હતી.