ધરમપુરના શેરીમાળ ગામના ઝાડી ફળિયામાં રહેતા રામુભાઈ ખાલપુભાઈ માહલા (ઉ.વ.૬૯) સાંજે સાઈકલ લઈને ચા-નાસ્તો કરવા માટે બિલપુડી ગામે ગયા હતા. તે સમયે ચા-નાસ્તો કર્યા બાદ રામુભાઇ રોડની સામેની તરફ મૂકેલી સાઈકલ લેવા માટે રોડ ક્રોસ કરી રહ્યા હતા.

આ દરમિયાન આ રોડ પરથી પસાર થઈ રહેલા બાઈકના ચાલક રૂદ્ર રણજીતભાઈ પટેલ (રહે.નાયક ફળિયા સિદુમ્બર, તા.ધરમપુર)એ રામુભાઈને ટક્કર મારી હતી. તે દરમિયાન ગંભીર રીતે ઈજા પામેલા રામુભાઈને સારવાર માટે ધરમપુરની શ્રીમદ રાજચંદ્ર હોસ્પિટલમાં દાખલ કરવામાં આવ્યા હતા. જ્યાં તેમનું સારવાર દરમિયાન મોત નીપજ્યું હતું. આ બાબતે મૃતકના પુત્ર જગદીશભાઈ માહલાએ અકસ્માત સર્જનાર બાઇક ચાલક સામે ધરમપુર પોલીસ મથકમાં ફરિયાદ નોંધાવી હતી.