વાપી GIDC વિસ્તારમાં થોડા સમયથી રાહદારીઓના હાથમાંથી મોબાઇલ ઝૂંટવી ફરાર થનારી ગેંગ સક્રિય થઇ હતી જેને લઇ પોલીસે અજાણ્યા ચોર ઈસમોની શોધખોળ હાથ ધરી હતી. પોલીસ સ્ટાફનાં માણસો GIDC વિસ્તારમાં પેટ્રોલીંગમાં હતા. તે સમયે મળેલી બાતમીનાં આધારે રેમન્ડ સર્કલ પાસે રોડ ઉપર બાતમી વાળી બે એક્સેસ મોપેડ આવતા જોઇ બંને ચાલકોને અટકાવી મોપેડનાં કાગળો માંગતા તેઓ સંતોષકારક જવાબ આપી શક્યા ન હતા.

જ્યારે અંગઝડતી કરતા તેઓ પાસેથી 6 મોબાઇલ મળી આવતા બીલો બાબતે પૂછપરછ કરતા તેમણે કબૂલાત કરી હતી કે, ગત તા.8 ડિસેમ્બરે સવારે કચ્છી માર્કેટ સામેથી એક રાહદારીના હાથમાંથી વન પ્લસ આર ફોન ઝૂંટવી તેઓ ફરાર થઇ ગયા હતા. જોકે હાલ આરોપી હર્ષ પંકજ ઝા (રહે.દાભેલ, રમણભાઇની ચાલ) અને રોહિત છેદીલાલ નિર્મલ (રહે.જીતુભાઇની ચાલ દાભેલ-દમણ) પાસેથી બે મોપેડ જેની કિંમત રૂપિયા 80,000/- અને 6 નંગ  મોબાઈલ મળી કુલ રૂપિયા 1,46,000/-નો મુદ્દામાલ કબ્જે કરી વધુ તપાસ હાથ ધરી હતી.