સુરત જિલ્લાના કામરેજ નવી પારડી નજીક નેશનલ હાઈવે પર યુ-ટર્ન લઈ રહેલા કન્ટેનર પાછળ એસ.ટી. બસ ઘુસી જતા અકસ્માતની ઘટનામાં કન્ટેનર પલ્ટી મારી જતા હાઇવે પર ટ્રાફિક જામ સાથે અફરા તફરીનો માહોલ સર્જાયો હતો. સુત્રો પાસેથી મળતી માહિતી અનુસાર, કામરેજ પોલીસની હદમાં નવી પારડી ગામની સીમમાં મુંબઇથી અમદાવાદ તરફ જતા નેશનલ હાઈવે-૪૮નાં રોડ પર નાશિકથી અમદાવાદ તરફ જઈ રહેલી પેસેન્જરો ભરેલી બસ નંબર જીજે/૧૮/ઝેડ/૯૯૫૮ રાજ હોટલ ક્રોસ કરી આગળ જઈ રહી હતી.

તે દરમ્યાન વહેલી સવારે ધુમ્મસનાં પગલે રાજ હોટલની દિશામાંથી યુ-ટર્ન લઈ પુરપાટ આવી રહેલા કન્ટેનર નંબર જીજે/૦૬/એવી/૫૨૩૩ની પાછળ ઉપરોક્ત સરકારી બસ ધડાકાભેર અથડાઈ હતી. આ સમયે કન્ટેનર ચાલકે પણ સ્ટેરીંગ ઉપરનો કાબુ ગુમાવી દેતા મુખ્ય રસ્તા પર કન્ટેનર પલ્ટી મારી ગયું હતું. તે સમયે બસમાં સવાર મુસાફરોનાં જીવ તાળવે ચોંટી ગયા હતા જેના પગલે હાઈવે પર લાંબો ટ્રાફિક જામ થઈ ગયો હતો. વાહન ચાલકો ફસાઈ ગયા હતા, કલાકો સુધી હાઇવે પર અફરાતફરીનો માહોલ સર્જાયો હતો. જોકે બનાવની જાણ થતા સુરત જિલ્લા ટ્રાફિક પોલીસ અકસ્માતગ્રસ્ત સ્થળે પહોંચી જઈ પરિસ્થિતિ પૂર્વવત કરવામાં જોડાઈ હતી. સદનસીબે કોઈ જાનહાનિ થઈ ન હતી.