અમદાવાદનાં બોડકદેવના સૂરધારા સર્કલ પાસે શ્રી રત્ન કોમ્પ્લેક્ષના પાર્કિંગ માંથી રૂપિયા 9 લાખની ઈનોવા ક્રિસ્ટા કાર લઈ તસ્કરો ફરાર થઈ ગયા હતા. બનાવ અંગે સોલા પોલીસે રવિવારે ચોરીનો ગુનો દાખલ કરી તપાસ હાથ ધરી હતી. બનાવની વિગત એવી છે કે, સોલા ભાગવત ચાર રસ્તા પાસે સાંઈબાબા મંદિર પાસે ઉત્સવ બંગલોમાં રહેતાં શૈલેષકુમાર બળદેવભાઈ પટેલ નિકુલ ટ્રાવેલ્સના સર્વિસના નામે સૂરધારા સર્કલ પાસે શ્રી રત્ન કોમ્પ્લેક્ષમાં ઓફિસ ધરાવે છે.

જોકે શૈલેષભાઈની 2017 મોડેલની ઈનોવા કાર રૂપિયા 9 લાખની ગત તા.3 મેના રોજ ઓફિસના પાર્કિંગમાં પાર્ક કરી હતી. જયારે બીજા દિવસે સવારે જોયું તો ગાડી પાર્કિંગમાં જોવા મળી ન હતી અને કારના ઓરીજીનલ આરસી બુક સહિતના ડોકયુમેન્ટ અંદર પડ્યા હતા. બનાવ અંગે શૈલેષભાઈએ સોલા પોલીસને જાણ કરતા પોલીસે ગુનો નોંધી તપાસ શરૂ કરી હતી.